“Odlar Yurdu” Gənclər İctimai Birliyinin təşkilatçılığı ilə Gəncə şəhərindən bir qrup gənc Ağdam rayonuna səfər edib.Gənclər əvvəlcə rayonun girişində “Şəhidlər” abidə kompleksini ziyarət edərək önünə gül-çiçək düzmüş, Soltanbud təpəsində inşa edilmiş Dövlət Bayrağı meydanından rayon ərazisini seyr edib.
Gənclər sonra Quzanlı qəsəbəsində ümummilli lider Heydər Əliyevin abidəsini ziyarət edərək, “Qala” istirahət parkında, Heydər Əliyev Mərkəzində və Çəmənli kəndində Seyid Lazım ağanın ziyarətgahında olub.
Yeni Azərbaycan Partiyası (YAP) Ağdam rayon təşkilatında qonaqlarla ağdamlı gənclərin görüşü keçirilib.YAP Ağdam rayon təşkilatının sədri İsgəndər Quliyev, gənclər birliyinin sədri Amil Cavadov, gənclər və idman idarəsinin rəisi Elnur Əhmədov və “Odlar Yurdu” Gənclər İctimai Birliyinin sədri Nigar Ələsgərova çıxış edərək Gəncə və Qarabağ gəncləri arasında əlaqələrin qurulması baxımından görüşün əhəmiyyətini yüksək qiymətləndirib.
Ağdam Dövlət Dram Teatrına gələn gənclərə Ağdam şəhərinin işğaldan əvvəlki və sonrakı görüntüləri əks olunmuş “Qafqaz Xirosiması” filmi və uşaq musiqi məktəbləri xor kollektivlərinin ifası təqdim edilib. Burada gəncəli gənclərə rayon haqqında geniş məlumat verilib.
Gənclər cəbhə bölgəsi olan Ağdam rayonunun sosial-iqtisadi inkişafından və səmimi dostluq şəraitində keçən görüşdən məmnun qaldıqlarını bildirib.
