Azərbaycan Respublikasının Gürcüstandakı Səfirliyi, Dini Qurumlarla İş üzrə Dövlət Komitəsinin (DQİDK) birgə təşkilatçılığı və Mənəvi Dəyərlərin Təbliği Fondunun təşəbbüsü ilə Gürcüstanın Rustavi şəhərində iftar mərasimi təşkil edilib.
"Report"un yerli bürosu xəbər verir ki, mərasimdə səfirliyin əməkdaşları, DQİDK-in sədri Ramin Məmmədov, Gürcüstanın Dini Məsələlər üzrə Agentliyinin direktoru Zaza Vaşakmadze, Kvemo-Kartlinin qubernatoru Qiorqi Doxturaşvili və müavini Qiorqi Şincikaşvili, parlamentin deputatları - Aleksandre Dalakişvili, İrakli Şatakişvili, Givi Mikanadze, Dimitri Xundadze, Rustavi meri Nino Latsabidze və digər şəxslər, soydaşlarımız, yerli icma üzvləri, din xadimləri iştirak ediblər.
Azərbaycanın Gürcüstandakı səfiri Faiq Quliyev çıxışında bu ölkədə yaşayan azərbaycanlılara göstərilən dəstək və hörmətdən məmnunluğunu bildirib. O, qeyd edib ki, bu cür tədbirlər həmrəylik və qardaşlıq ruhunu gücləndirir, iki ölkə arasında möhkəm əlaqələrin qurulmasına töhfə verir. Səfir Gürcüstan hökumətinin, xüsusən Baş nazirin rəhbərliyi ilə, Azərbaycana və onun icmasına verdiyi dəstəyi yüksək qiymətləndirib.
F.Quliyev həmçinin, Gürcüstanda yeni məscidlərin inşasına başlanıldığını və dini xadimlərlə əməkdaşlığın dərinləşdirildiyini vurğulayıb. O, bu inkişafların Gürcüstan dövlətinin azərbaycanlılara verdiyi dəyərin göstəricisi olduğunu qeyd edib.
DQİDK-in sədri Azərbaycan və Gürcüstan bayraqlarının bir arada dalğalanmasının iki ölkə arasındakı dostluğun simvolu olduğunu qeyd edib. O, Azərbaycan-Gürcüstan münasibətlərinin strateji əhəmiyyətini vurğulayaraq, xalqların birliyinin hər iki dövlətin inkişafına müsbət təsir etdiyini vurğulayıb.
Gürcüstan parlamentinin deputatı İrakli Şatakişvili müsəlmanları Ramazan bayramı münasibətilə təbrik edib.
Milli Məclisin Müdafiə, Təhlükəsizlik və Korrupsiya ilə Mübarizə Komitəsinin sədri, Azərbaycan-Gürcüstan Parlamentlərarası Əlaqələr İşçi Qrupunun rəhbəri Arzu Nağıyev iki ölkə arasındakı əlaqələrin hər gün daha da gücləndiyini qeyd edib.
Sonda Azərbaycanın və Gürcüstanın rifahı və sülhü üçün dualar edilib.
