Bu barədə təhsil eksperti Kamran Əsədov məlumat paylaşıb.
AZXEBER.COM xəbər verir ki, sağlamlıq imkanları məhdud olan Günay Ağayeva müəllimlərin işə qəbulu imtahanında 43 bal yığsa da, işlə təmin edilməyib.
Təhsil eksperti Kamran Əsədovun sözlərinə görə, tələbəsi müəllimlərin işə qəbulu imtahanından keçsə də Təhsil Nazirliyi heç bir səbəb göstərmədən onu işlə təmin etməyib:
"Bu qanun pozuntusudur.Sağlamlıq imkanları məhdud uşaqlar üçün məktəbə müəllim qəbulu imtahanla yox, müəssisə tərəfindən nazirliyin göndərişi ilə həyata keçirilir".
Ekspert daha sonra məsələ ilə bağlı millət vəkili Qənirə Paşayevaya müraciət etdiklərini və deputatın bu barədə Təhsil Naziri Mikayıl Cabbarova müraciət etdiyini söyləyib. Artıq məsələyə rəsmi qurumun qarışmasından sonra Günay Ağayeva işlə təmin olunub.
Millət vəkili Qənirə Paşayeva da məsələyə münasibət bildirib:
"Qeyd edim ki, bir neçə gün əvvəl Günay Ağayevanın müəllimi, ona dəstək üçün böyük işlər görmüş Kamran Əsədovun tarix müəlliməsi olan Günayın işlə təmin olunmasının vacibliyi ilə bağlı paylaşdığı statusdan sonra Günay Ağayeva ilə görüşdük və belə bir dəyərli gəncimizin ixtisası üzrə işlə təmin olunmasının çox önəmli olduğunu gördük. Eyni zamanda onun işlə təmin olunmasının yüzlərlə fiziki imkanları məhdud gənclərimiz üçün də böyük bir stimul olacağını da gördük və onunla bağlı Təhsil naziri cənab Mikayıl Cabbarova müraciət edərək dəstək göstərilməsini xahiş etdik. Mikayıl müəllimə Günay xanımla bağlı müraciətimizə diqqət və həssaslıq göstərərək qısa zamanda onun işlə təmin olunmasına göstəriş verdiyi üçün bir daha təşəkkürümü bildirirəm. Eyni zamanda Günayın müəllimi Kamran Əsədova Günaya verdiyi böyük dəstək üçün bir daha təşəkkürlər. Əziz dostum Günaya isə işində böyük uğurlar diləyirəm və inanıram ki, o, çox gözəl bir müəllimə olaraq böyük uğurlar qazanacaq".
