Ramazan ayı yaxınlaşdıqca tez-tez "Hamiləlik dövründə oruc tutmaq sağlamlıq üçün riskli ola bilərmi?" sualı ilə rastlaşırıq.
Hamiləlik dövründə yaxşı qidalanma və kifayət qədər maye qəbulu çox vacibdir. Uzun saatlar ərzində ac və susuz qalmaq ana və körpənin sağlamlığına mənfi təsir göstərə bilər.
Hamiləlik dövründə oruc tutmaq sağlamlıq vəziyyətindən və həkimin tövsiyələrindən asılı olaraq dəyişir. İslam dini hamilə qadınların sağlamlıq üçün təhlükə yaratdığı halda oruc tutmamasına icazə verir. Oruc tutmaq istəyən hamilələr bu prosesi həkim nəzarəti altında və diqqətli qidalanaraq etmələri vacibdir.
AZXEBER.COM hamiləlik zamanı orucun təsirləri, mütəxəssis rəyləri və nəzərə alınmalı olan məsləhətləri təqdim edir:
Həkimlərin məsləhətinə görə ilk 3 ay körpənin orqan inkişafının başladığı ən kritik dövrdür. Bu dövrdə qan şəkərinin aşağı düşməsi, ürəkbulanma və qusma kimi problemlər tez-tez baş verə bilər. Yanlış qidalanma və susuzlaşdırma hamiləliyin pozulması riskini artıra bilər. Həkimlər ilk 3 ayda oruc tutmağı məsləhət görmürlər.
2-ci Trimestrdə (4-6 Ay) həkim nəzarəti altında oruc tutmaq olar. Körpənin inkişafı davam etdiyi üçün onun qida və maye ehtiyacları yüksək olur. Əgər ana sağlamdırsa və həkimi təsdiq edərsə, ehtiyatlı pəhriz şərtləri ilə oruc tutmaq olar. Ancaq uzun müddət ac qalmaq dəmir çatışmazlığına və aşağı təzyiqə səbəb ola bilər.
3-cü trimestrdə (7-9 ay) isə ümumiyyətlə oruc tutmaq tövsiyə edilmir. Körpənin ən sürətli böyüdüyü dövr olan bu zaman dilimində qida ehtiyacları ən yüksək səviyyədədir. Buna görə də anada zəiflik, anemiya ola bilər ki, bu səbəblə də həkimlər 7-ci aydan sonra oruc tutmağı zərərli hesab edirlər.
Aysel
