Şou-biznes nümayəndələrinin səhnə həyatı ilə yanaşı şəxsi həyatları da hər zaman insanlar üçün maraqlı olub. Bəlkə də elə ona görədir ki, şou-biznesdə çox zaman sənət yox, məhz şəxsi həyatla gündəmə gəlmək daha asan populyarlıq qazandıran yol kimi görünür. Lakin bu rəngarəng görünən səhnə həyatının arxasında bir çox məşhurların gərçəkdən hansı acılar yaşadığı gizlənir. Məşhur sima olmaqları onlara bəzi uğursuzluqlardan sığortalanmağa zəmin yaratmayıb.
AZXEBER.COM-un bu dəfəki araşdırması məhkumluq həyatı yaşamış tanınmışlarla bağlıdır.
14 il öncə, 2010-cu ildə reper Elşad Xose narkotik vasitələrin qanunsuz istifadəsinə görə polis tərəfindən saxlanılıb. Həbs olunan Xose bir müddət həbs həyatı yaşadıqdan sonra azadlığa buraxılıb.
Tanınmış rejissor Aqil M.Quliyev isə tanışının pulunu mənimsəməkdə təqsirli bilinərək istintaqa cəlb olunub. Rejissor Mariana Turabova adlı xanımdan 150 min manat borc pul alıb və qaytarmamasına görə 1il 6 ay müddətinə azadlıqdan məhrum edilib.
2014-cü ildə ən qalmaqallı həbs xəbəri isə tanınmış teleaparıcı İlham Mirzəyevin həbs olunması ilə bağlı idi. Dələduzluqda ittiham olunan Mirzəyev 3 il 6 ay həbs həyatı yaşayıb.
2015-ci ildə 3 il müddətinə azadlıqdan məhrum edilən müğənni Maral Tahirqızı isə əxlaqsızlıq yuvaları təşkil etmə, saxlama və ya bu məqsədlər üçün mənzil sahələri kirayə vermə maddəsi ilə təqsirləndirilib. Cəzasının üçdə iki hissəsini çəkdiyinə görə qanunun verdiyi imkandan yararlanaraq vaxtından əvvəl azadlığa buraxılıb.
"Avroviziya-2008" mahnı müsabiqəsində təmsil edən müğənni Samir Cavadzadənin də bəs həyatı yaşadığını bilirdinizmi? O, 2011-ci ildə dostu Elvin Hüseynovu bıçaqlaması ilə əlaqədar saxlanılaraq həbs olunub. Müğənni az müddət sonra həbsdən azad edilib.
2017-ci ildə Bakıda xüsusi təyinatlı vaqondan məhbusların qaçmasına köməklik etməkdə təqsirləndirilən müğənni Fədayə Laçın da həbs həyatı yaşayan qadın müğənnilərdəndir. 5 il cəza almasına baxmayaraq daha sonra onun cəzası 2 ilə endirilib və 2019-cu ilin oktyabr ayında azadlığa buraxılıb.
Sakit təbiətliliyi ilə bilinən müğənni Tunar Rəhmanoğlu isə 2013-cü ildə avtoxuliqanlıq edib və polisin qanunlarına məhəl qoymadığına görə 10 sutka həbs və bir illik sürücülük vəsiqəsindən məhrum edilmə cəzası ilə cəzalandırılıb.
İdmançı, ictimai fəal Kamil Zeynallı da bir neçə dəfə həbs xəbərləri ilə gündəmə gəlib. Kamil Zeynallı tərəfindən internet informasiya ehtiyatında, o cümlədən informasiya-telekommunikasiya şəbəkəsində yayılması qadağan edilən informasiyaların, foto və vidogörüntülərin yayılması halları müəyyən edildiyindən Füzuli rayon məhkəməsinin qərarı ilə barəsində 10 gün müddətinə inzibati tənbeh növündə həbs seçilib.
Müğənni Manaf Ağayev də işğaldan azad edilmiş ərazilərə icazəsiz getdiyinə gör 15 gün həbs edilib.
Bir neçə dəfə həbsxana həyatı yaşayan tanınmış prodüser Təranə Səmədova 2023-cü ilin fevral ayında yenidən həbs edilib. O, Cinayət Məcəlləsinin 182-ci ( hədə-qorxu ilə tələb etmə) maddəsi ilə ittiham olunub. Bu il oxunan hökmə əsasən, Təranə Səmədova 6 il müddətinə azadlıqdan məhrum edilib.
Qeyd edək ki, hal-hazırda həbsdə olan T.Səmədova 2017-ci ildə də qadın alverində ittiham olunaraq 2 il müddətinə azadlıqdan məhrum edilmişdi. 2019-cu ildə azadlığa çıxan tanınmış prodüser ötən il də qanunsuz olaraq narkotik maddə gəzdirdiyi üçün saxlanılmışdı. Məhkəmə T. Səmədovanın hamilə olduğunu nəzərə alaraq, ona həbs cəzası verməmişdi. Prodüser 400 manat məbləğində cərimə olunaraq sərbəst buraxılmışdı.
Musiqi aləmini ən çox sarsıdan hadisə isə qonşusunu qətlə yetirməkdə təqsirləndirilən meyxanaçı Rəşad Dağlının həbsi oldu. Rəşad Dağlı qəsdən adam öldürməkdə və soyuq silah saxlamaqda təqsirli bilinərək 9 il 6 ay müddətinə azadlıqdan məhrum edilib. Hazırda o, cəzasını ciddi rejimli cəzaçəkmə müəssisəsində çəkir.
Həbs edilən məşhurlar sırasında dünyasını dəyişmiş simalara da rast gəlmək mümkündür.
Sevilən reper Hüseyn Dərya narkotik istifadə etməsi səbəbindən həbsdə yatıb. Bir neçə dəfə eyni əməli təkrarladığına görə həbs olunan reper 2014-cü ilin martında avtomobil qəzasında dünyasını dəyişib.
Meyxanaçı Bayram Kürdəxanlı da Cinayət Məcəlləsinin 234-cü (narkotik vasitələrin qanunsuz dövriyyəsi) maddəsi ilə həbs olunub. O, 2017-ci ildə avtomobil qəzasında vəfat edib.
Aysel Hacızadə
