Keçən həftə məhkəmə zalında həbs edilərək cəzasını çəkmək üçün Kürdəxanı həbsxanasına göndərilən rejissor Aqil M.Quliyev həbsindən 4 gün sonra, şənbə günü efirdə olub.Rejissor yaxın dostu müğənni Nura Suri ilə birlikdə ATV-nin "Necə varsa" proqramının qonağı olub. Müğənni Samir Piriyevin aparıcısı olduğu verilişin həmin buraxılışında meyxanaçı Namiq Qaraçuxurlu və idmançı Kamil də qonaq olublar. Aqil M.Quliyevin həbsindən xəbərdar olan tamaşaçılar rejissorun həbsxanadan azad olunduğunu düşünüblər. Əslində isə həmin verlişin çəkilişi Aqil.M.Quliyevin həbsindən bir neçə gün öncə olub.
Xatırladaq ki, Aqil M.Quliyev Xətai rayon məhkəməsinin qərarı ilə 23 aprel 2013 tarixində 1 il 6 ay müddətinə azadlıqdan məhrum edilib. Rejissor məhkəmə zalında həbs olunub və cəzacəkmə müəssisəsinə göndərilib. O, Mariana Turabovanın şikayəti əsasında həbs edilib.
Marianna Turabova hüquq-mühafizə orqanlarına müraciət edərək, Aqil M. Quliyevin ona 150 min manat borcu olduğunu, lakin pulu geri qaytarmadığını bildirib. Bundan sonra araşdırma aparılıb və iddiaçının şikayəti təmin edilib. Məhkəmə həmin pulun Aqil M.Quliyevdən tutularaq şikayətçiyə qaytarılması barədə qərar qəbul etsə də, cavabdeh tərəf bu qərarı icra etməyib. Qərar icra olunmadığından Cinayət Məcəlləsinin 306.1-ci (qanuni qüvvəyə minmiş məhkəmə qərarını qərəzli olaraq icra etməmə) maddəsi ilə cinayət işi başlanılıb, nəticədə rejissor həbs olunub.
Hazırda həbsdə olan rejissor Aqil M. Quliyevin barəsində hökmdən apellyasiya şikayəti verilib. Şikayət Bakı Apellyasiya Məhkəməsinə təqdim olunub. Yaxın günlərdə apellyasiya şikayəti əsasında məhkəmə başlayacaq.//anspress
