Milli Şura daxilində baş verənləri bu quruma üzv olmayan müxalifət partiyaları təşkilat daxilindəki intriqalarla bağlayır.
Prezident seçkiləri yaxınlaşdığı bir ərəfədə Milli Şuranın vahid namizədi Rüstəm İbrahimbəyovun hələ də Bakıya gəlməməsi müxalifət arasında gərginliyi artırır. Bəzi siyasi qüvvələr düşünür ki, seçkilərə qədər Milli Şura dağılacaq və Rüstəm İbrahimbəyovdan başqa digər liderlər də namizədliyini irəli sürəcək. Lakin Milli Şura daxilində vahid namizədlə seçkiyə gedəcəklərinə inam var.Bir neçə müxalifət partiyasının yaratdığı Milli Şuranın prezidentliyə vahid namizədi hesab olunan Rüstəm İbrahimbəyovun iyulun 31-də Bakıya qayıdacağı gözlənilir. Bu ərəfədə müxalifət düşərgəsində seçkilərdə iştirak mövzusu ətrafında müzakirələr böyüyür. Hüquq müdafiəçisi, Sülh və Demokratiya İnstitutunun rəhbəri Leyla Yunus deyir ki, Müsavat başqanı İsa Qəmbərin də namizədliyinin irəli sürülməsinə baxmayaraq, Milli Şuranın vahid namizədi Rüstəm İbrahimbəyovdur: “Əgər hansısa başqa namizəd olsa, əgər seçkiyə başqa bir namizəd getsə, fikrimcə, bu, hökumətin ssenarisini həyata keçirmək deməkdir”Milli Şura daxilində baş verənləri bu quruma üzv olmayan müxalifət partiyaları təşkilat daxilindəki intriqalarla bağlayırlar. Azərbaycan Demokrat Partiyasının sədri Sərdar Cəlaloğlu intriqanın çox olduğunu düşünür: “Milli Şuraya daxil olanların bir qrupunun bəyanatından elə görünür ki, Rüstəm İbrahimbəyov olmayacağı təqdirdə, bunlar seçkiləri boykot etmək istəyirlər. Müsavat Partiyası isə boykotun əleyhinədir".Prezident seçkiləri zamanı özünü hakimiyyətin əsas rəqibi sayan Milli Şuranın fəaliyyətinə iqtidar komandasında isə bir qədər istehza ilə yanaşırlar. Yeni Azərbaycan Partiyasının icra katibinin müavini, deputat Siyavuş Novruzov bildirmişdi ki, müxalifətin bu birliyinin də aqibəti əvvəlkilərdən fərqli olmayacaq. Bu qurum da dağılmağa məhkumdur: “Biz əvvəlcədən demişdik ki, İctimai Palatanın, bu təşkilatların heç bir perspektivi yoxdur. Çünki orada təmsil olunan insanları hamı tanıyır. Milli Şura da İctimai Palatanın vəziyyətinə düşəcək”.
Müxalifət düşərgəsində yeni bir qalmaqal isə Rəsul Quliyevin Açıq Cəmiyyət Partiyası ilə Müsavat Partiyası arasında yaranıb. Rəsul Quliyev 2003-cü ildə prezident seçkilərində İsa Qəmbəri dəstəkləməyini ən böyük səhvi adlandırıb və deyib ki, İsa Qəmbərə güvənmək olmaz. Buna cavab olaraq, Müsavat rəsmisi Arif Hacılı Rəsul Quliyevi satqın adlandırıb.
