2020-ci ilin 27 sentyabr tarixində Ermənistan silahlı birləşmələrinin Azərbaycana qarşı törətdikləri növbəti təxribat xarakterli hücumlar cavabsız qalmadı.
Ali Baş Komandan İlham Əliyevin xalqa müraciəti ərəfəsində xalqın əzmi, cəsarəti və inamı göz qabağında idi. Hər kəs sanki ağına-qarasına baxmayaraq, silaha sarılıb döyüş meydanına qaçmağı dörd gözlə gözləyirdi.
Prezident müraciətini etdi və erməni barbarlığına qarşı səfərbərlik elan edildi. Qocasından tutmuş cavanına qədər, hər kəs səfərbərliyə qoşuldu və ən yaxın hərbi komissarlığa üz tutaraq döyüşə getmək üçün tələsdilər.
Xalq nə qədər mübariz, rəşadətli, cəsur olduğunu 44 günlük müharibənin ilk günləri bütün dünya ictimaiyyətinə göstərdi.
Cəbhədə şiddətli döyüşlər gedərkən informasiya cəbhəsində də uğurlu döyüş gedirdi. Təbii ki, bu müharibədə jurnalistlər, nazirlər, elm adamları, ən əsas da cənab Prezidentimiz İlham Əliyev müvəffəqiyyətlə vuruşurdu.
İstər 44 günlük dönəmdə, istərsə də müharibə bitdikdən sonra belə İlham Əliyev xarici media subyektlərinə müsahibələr verərək Azərbaycan xalqının doğru yolda olduğunu bəyan etdi və Azərbaycanın haqq səsini Qərbli, Şərqli bütün cahana çatdırdı.
İlham Əliyevə qarşı həmin vaxtlarda müxtəlif provokasiyalar, siyasi təzyiqlər olsa da, informasiya savaşı böyük əzmlə, hünərlə və istəklə reallaşırdı.
Nəticədə Ali Baş Komandan İlham Əliyev həm siyasi cəbhədə, həm informasiya savaşında qalib oldu və İlham Əliyevin yüksək polemikası Azərbaycan xalqını dünyada beynəlxalq tribunlarda tanıtdı.
Müharibə dönəmində cənab Prezidentin dediyi fikirlər müharibə bitdikdən sonra belə dünya ictimaiyyətinin dilində sitat oldu. Böyük dövlətlərin başçıları İlham Əliyevin siyasi taktikasından bu gün də müvəffəqiyyətlə istifadə edirlər.
Əzmkar və rəşadətli Ordumuzun Baş Komandanı olan dövlət başçımız bu gün də siyasi tribunada Ermənistana qarşı öz fikirlərini çəkinmədən dilə gətirir və xüsusi iradə sərgiləyir.
Qarabağ torpaqları İlham Əliyevə qədər belə bir tarix yaşamayıb. Yaşasın İlham Əliyev! Qarabağ Azərbaycandır!
Mikayıl Mirzəzadə
