Mayın 14-ü Brüsseldə Azərbaycan Prezidenti İlham Əliyev və Ermənistan Baş naziri Nikol Paşinyan arasında keçiriləcək
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov AZXEBER.COM-a açıqlamasında nəzərdə tutulan görüş haqda fikirlərini bildirib.
Politoloq Azərbaycan və Ermənistan XİN rəhbərlərinin Vaşinqton görüşünün Brüsseldə Azərbaycan Prezidenti İlham Əliyev və Ermənistan Baş naziri Nikol Paşinyan arasında keçiriləcək görüşə təsiri ilə bağlı danışıb:
"ABŞ dövlət katibi Entoni Blinkenin iştirakı ilə Azərbaycan və Ermənistan xarici işlər nazirləri arasında keçirilən Vaşinqton görüşdə irəliləyişlərin olması ilə bağlı həm Azərbaycan tərəfi, həm də ABŞ tərəfi məlumat yaydı. Görüşlə bağlı Ermənistan tərəfindən bəzi məlumatlar yayılsa da, ancaq tam əksini tapmır. Ermənistan Təhlükəsizlik Şurasının katibi Armen Qriqoryan görüşdə yekun nəticənin əldə edilmədiyini bildirib. Vaşinqton görüşündə birinci razılıq sülh danışıqları prosesinin sürətləndirilməsi oldu. Bu proses üçün maneələr var. Eyni zamanda maraqlı tərəflər də var. Rusiya, İran, Fransa və digər ölkələr var ki, prosesin içindədirlər. Ermənistana təzyiq imkanları böyükdür. Ondan istifadə etməyə çalışırlar. Paşinyan hökümətinin özünü tam möhkəmlətməsi mümkün olmayıb. Qeyd etdiyim ölkələr ona təsir etmək imkanına malikdir”.
Samir Hümbətovun fikrincə, Vaşinqton görüşündə bəzi məsələlər xüsusən də sülh müqaviləsinin detalları müzakirə olunub:
"Ən önəmli məqamlar Brüssel görüşünə saxlanılıb. Vaşinqton görüşü Brüssel görüşünün alt bazasının möhkəmlənməsinə təkan verdi. Brüssel görüşündə taleyüklü məsələlər müzakirə olunacaq. Çünki belə məsələlərə liderlər səviyyəsində qərar verilir. Vaşinqton görüşü 5-ci Brüssel görüşünün daha da qüvvətlənəsinə səbəb oldu”.
