Bu gün Bakıda Milli Qəhrəman Çingiz Mustafayev Fondu və ANS Şirkətlər Qrupunun təsis etdiyi "İlin adamı" mükafatının təqdimetmə mərasimi keçirilib. ANS PRESS-in məlumatına görə, mərasimdə ANS Şirkətlər Qrupunun rəhbərliyi, millət vəkilləri və sənət adamları iştirak ediblər.Tədbiri ANS Şirkətlər Qrupunun vitse-prezidenti Mir Şahin Aöğayev açıb və sözü ANS Şirkətlər Qrupunun vitse-prezidenti Seyfulla Mustafayeva verib. S. Mustafayev çıxış edərək bildirib ki, "İlin adamı" mükafatı artıq 11-ci dəfədir ki, təqdim edilməsinə baxmayaraq , ilk dəfədir ki, mükafat bir yox, iki nəfər verilir. Bu mükafat "Eurovision-2011" mahnı müsabiqəsində Azərbaycana qələbə sevincini yaşadan Eldar Qasımov və Nigar Camala verilir. Onlar bu ada ötən il bütün Avropanı arxada qoyaraq Vətənimizin bayrağını qaldırmaqla əsl vətənpərvərlik nümunəsi göstərdiklərinə, Azərbaycanı beynəlxalq miqyasda daha yaxşı tanıtdırdıqlarına, ölkəmizin müsbət imicinin formalaşması baxımından əhəmiyyətli addım atdıqlarına, mədəniyyətimizin yüksək səviyyədə təbliğinə, nüfuzlu mahnı müsabiqəsinin Azərbaycana gətirilməsi ilə ölkəmizə marağın artmasına səbəb olduqlarına və bununla da Azərbaycanın ümumi inkişafına samballı töhfə verdiklərinə görə layiq görülüblər.S. Mustafayevin sözlərinə görə, Azərbayacan “Eurovision” müsabiqəsinə çox ciddi yanaşdığını yaxşı nəticələrlə sübut etmişdi: "Samir və Elnurun, Araş və Ayselin, Səfurə Əlizadənin birinci yerə yaxınlaşması reallıq idi. May Azərbaycanın müstəqilik bayramı ayıdır. Azərbaycana böyük qələbə gətirən iki vətəndaşımız bu nəticə ilə eyni zamanda bir neçə nəticəni həyata keçirdi. Bütün Avropanı arxada qoyaraq Azərbaycanın bayrağını qaldıran və bununla da əsl vətənpərvərlik nümunəsi göstərən Eldar və Nigar bir rəmzə çevrildilər. Eldar və Nigarın səhnəyə Azərbayacan və Türkiyə bayrağı ilə daxil olması isə "bir millət iki dövlət" fəlsəfəsinin sadə yolla sübutu idi. Bu qələbə həm də uzun illər erməni diasporunun daha möhkəm, daha güclü olmaları barədə rəyə sarsıdıcı zərbə idi. Bu, Avropanaın müxtəlif bölgələrində yaşayan soydaşlarımızın birliyinin nəticəsi idi. Qalib gələn təkcə iki gəncin səsi deyildi. Bu uğur hamımızın verdiyi səslərin cəmi idi. Biz yarışa qədər çox ciddi təşkilati işlər görən, nailiyyətə etibarlı zəmin hazırlamaqla uğurun möhkəm təməlini qoyan ölkə rəhbərliyi, Heydər Əliyev Fondu və İctimai Televiziyanın zəhmətini xüsusi qiymətləndirməliyik".ANS Şirkətlər Qrupunun vitse-prezidenti Azərbaycanın təbii ki, buna qədər də tanınıdığını vurğulayıb: "Nneft, iqtisadi inkişafımızla, mədəni tarixi keçmişimizlə, dövlətimizin bölgədə oynadığı mühüm rola görə tanınırdı. Ancaq etiraf edək ki, məhz bu qələbə Avropanın birincisi olan Azərbaycanı ildırım sürəti ilə məşhur etdi. İndi Avropanın elə bir ölkəsi tapılmaz ki, orada bu emosional duyğuların əks olunduğu səmimi sevgi mahnısı səslənməsin. Bu qələbə ilə məddahların illər boyu dünyaya qəddar bir ölkənin insanı kimi təqdim etdiyi azərbaycanlı obrazı darmadağın edildi. Qaliblərimizin mətbuat konfransında ən müxtəlif məqsədlər güdən suallara verdiyi soyuqqanlı və səmimi şəkildə cavablar millətimizin nə qədər mütərəqqi, mədəni və tolerant olduğunu nümayiş etdirdi.Bütün Avropa Azərbaycan mədəniyyətini alqışlayırdı. İndi kimin necə yanaşmasından asılı olmayaraq, ortada Azərbaycan mədəniyyəti var idi və bu qələbə onun ayağına yazılırdı. Müstəqil Azərbaycanın vətəndaşları müstəqil Azərbaycanın mədəniyyətini tarixə həkk etdirdi. Eldar və Nigar “Eurovision”u Azərbaycana gətirdilər. Bu, təkcə mədəni naliyyət deyildi, bu həm də Avropa ölkələrinin xoş məramla Azərbaycana dəvət olunması idi. Onlarla ölkədən qonaq düşəcək insanların Azərbaycanın inkişafına verəcək tövhənin səbəbi idi.“Eurovision”nun Bakıya gəlişi Azərbaycanın Avropa standartlarına tam cavab vermək istəyinə təkan, ölkənin ən müasir standartlara cavab verən infrastruktur layihələrini sürətləndirən bir fürsət idi. Bir sözlə "İlin adamı" elan etdiyimiz şəxslərin uğurları dövlətimiz və millətimiz üçün belə qiymətləndirilir.İndi isə gəlin o qürur dolu anları birlikdə bir daha yaşayaraq. Sizi "İlin adamı" nominantlarının xidmətlərini əks etdirən videçarxa baxmağa dəvət edirik", deyə Seyfulla Mustafayev qeyd edib.Mərasimdə qonaqlara "Eurovision-2011" qaliblərinin uğurlarından ibarət videoçarx nümayiş olunub və nəhayət Eldar Qasımov və Nigar Camal səhnəyə dəvət edilib."İlin adamı" diplomlarını qaliblərə Seyfulla Mustafayevin özü təqdim edib. Diplomlardan əlavə Eldar və Nigara məşhur "Raymond weil" saat şirkəti tərəfindən onlar üçün xüsusi hazırlanmış dəyərli saatlar hədiyyə edilib. Milli Qəhrəman Çingiz Mustafayev Fondu və ANS Şirkətlər Qrupu "İlin adamları"na həmçinin 4 min manat məbləğində pul mükafatı da təqdim edib.Seyfulla Mustafayev bildirib ki, bank qanunlarına görə pul mükafatı ancaq bir adamın adına yazılmalı olduğundan, pul mükafatı el adəti ilə kişinin adına yazılıb. "Onlar bunu özləri bölüşdürərlər", deyə S. Mustafayev sözlərini zarafatla bitirib.Təqdimetmə mərasimindən sonra ürək sözlərini deyən Eldar Qasımov öncə hamını salamlayıb:"ANS Şirkətlər Qrupuna və Çingiz Mustafayev Fonduna dərin təşəkkürümüzü bildiririk ki, bizi bu gözəl mükafata layiq görmüsünüz və bizim işimizi belə dəyərləndirmisiniz. Əminəm ki, Azərbaycan gələn illərdə də belə qələblələrlə zəngin olacaq. Çox sağ olun!"Nigar Camal isə bu mükafata layiq görüldüyünə görə çox xoşbəxt olduğunu bildirdi:"Dərin təşəkkürümü bildirirəm. Biz çox xoşbəxtik, bu bizim üçün böyük mükafatdır. Çox sağ olun ki bizə inandınız və bizi seçdiniz".
