Bəzən dünyanın gedişatını dəyişəcək böyük bir ideya ilk baxışdan qeyri-mümkün, hətta gülünc görünə bilər. Tarix boyu bir çox məhsul bazara çıxarkən sərt tənqid, istehza və şübhə ilə qarşılaşıb. Onlardan biri də texnologiya sahəsinin liderlərindən olan "Apple” şirkətinin ilk "iPhone” modeli olub.
BBC xəbər verir ki, "Apple” ilk "iPhone”u təqdim edəndə cihaz ictimaiyyət tərəfindən istehza ilə qarşılanıb. Tənqidçilər 500 dollarlıq qiymətə gülür və cihazın tamamilə uğursuz olacağını proqnozlaşdırırdılar.
Həmin dövrdə "iPhone”da fiziki klaviaturanın olmaması da ciddi tənqid olunurdu. Fiziki klaviaturaya malik "BlackBerry” cihazları daha funksional hesab edilirdi.
Tənqidçilər həm musiqi pleyeri, həm də kompüter funksiyalarını bir cihazda birləşdirməyin qeyri-mümkün olduğunu düşünürdülər. Nazik şüşə ekranın asanlıqla qırıla biləcəyi, batareyanın işləmə müddətinin isə həmin dövrün digər cihazları ilə müqayisədə daha az olduğu bildirilirdi.
"Microsoft”un baş direktoru Stiv Ballmer də "iPhone”un əhəmiyyətli bazar payı qazanacağına inanmadığını açıqlamışdı.
Lakin həmin proqnozların əksinə olaraq, "iPhone” zamanın sınağından keçdi. Məlumata görə, 2007-ci ildən etibarən "iPhone” "Apple” üçün 2,1 trilyon dollardan çox ümumi gəlir əldə edib.
///modern.az///
