İngiltərədə bu ilin may-iyul aylarında müşahidə olunan isti hava dalğalarının ölkə iqtisadiyyatına ən azı 4,4 milyard funt sterlinq zərər vurduğu hesablanıb.
AZXEBER.COM xəbər verir ki, bu barədə "Verdant” düşüncə qurumunun apardığı araşdırmada məlumat verilib.
Təhlilə əsasən, İngiltərədə may ayından iyulun sonunadək ümumilikdə dörd isti hava dalğası qeydə alınıb. Bu dövrdə yüksək temperaturun iqtisadiyyata vurduğu zərərin may ayında 510 milyon, iyunda 2,36 milyard, iyulda isə 1,5 milyard funt sterlinq olduğu təxmin edilir.
Məlumata görə, iqtisadi itkilərin əsas səbəbi isti hava səbəbindən yaranan istehsal azalması olub. Ən ciddi itkilər ölkənin cənub-şərqində, Londonda və bəzi digər bölgələrdə qeydə alınıb.
Araşdırmada qeyd olunub ki, yüksək temperaturun təsirlərinin qarşısının alınması üçün lazımi tədbirlər görülməzsə, isti hava dalğalarının yaratdığı iqtisadi itkilər 2030-cu ilə qədər 25,6 milyard funt sterlinqə çata bilər.
"Verdant”ın həmsədri və hesabatın müəllifi Ceyms Midvey bildirib ki, iqlim dəyişikliyi ilə əlaqədar iqtisadi itkilər artıq artmağa başlayıb və qarşıdakı illərdə vəziyyət daha da ağırlaşa bilər.
Onun sözlərinə görə, hökumətin işçiləri və müəssisələri ekstremal istilərin təsirlərindən qorumaq üçün tədbirlər görməsi artıq gecikib.
Qeyd edək ki, İngiltərədə bu həftə ilin beşinci isti hava dalğası yaşanır. Sabah temperaturun 36-37 dərəcəni keçəcəyi gözlənilir.
Bununla yanaşı, İngiltərə Ətraf Mühit Agentliyi ölkə ərazisinin 71,3 faizi üçün rəsmi quraqlıq elan edib.
