Çinin Bazar Tənzimləmə üzrə Dövlət İdarəsi Panama kanalı da daxil olmaqla bir sıra limanların satışı ilə bağlı hərtərəfli antiinhisar təhqiqatı aparacaq.
Çinin Bazar Tənzimləmə üzrə Dövlət İdarəsi bununla bağlı bu gün bəyanat yayıb.
Qeyd edilib ki, müəssisələrin konsentrasiyası icazəsiz həyata keçirilə bilməz, əks halda hüquqi məsuliyyət yaranır. Bildirilib ki, Honq-Konqda yerləşən "Hutchison” Holdinqi ilə sövdələşmədə iştirak edən tərəflər antiinhisar yoxlamasından yayınmağa çalışmamalıdırlar.
Qeyd edək ki, martın əvvəlində ABŞ Prezidenti Donald Trampın təzyiqi ilə "Hutchison” Holdinqinin Panama kanalının hər iki ucunda yerləşən "Balboa” və "Cristobal” limanlarını satmaq niyyətində olduğu üzə çıxıb. Operatorun səhmlərinin 90 faizi "Blackrock”-un rəhbərlik etdiyi ABŞ konsorsiumuna keçməlidir. Sövdələşmənin dəyərinin 19-23 milyard dollar arasında olacağı proqnozlaşdırılır.
Qeyd edək ki, 2021-ci ildə bu limanları idarə etmək üçün "Hutchison” Holdinqi ilə müqavilə avtomatik olaraq daha 25 il müddətinə uzadılıb.
Pekin "Balboa” və "Cristobal” limanlarının ABŞ konsorsiumuna satılmasının ticarəti məhdudlaşdıracağı ehtimalından narahatdır.
///apa
