"İnsanların qeyri-etik davranışlarının səbəbləri çoxşaxəli və mürəkkəbdir”
Bu sözləri AZXEBER.COM-a açıqlamasında Milli Məclisin deputatı Kamal Cəfərov deyib.
O bildirib ki, belə davranışların səbəbi sosial təsirlər ola bilər:
"Belə davranışların səbəbi şəxsi maraqlar, sosial təsirlər, mədəni normalar və ya situativ amillər ola bilər. Müxtəlif nəzəriyyələr isə bu davranışların səbəblərini daha dərindən başa düşməyə kömək edə bilər. Koqnitiv dissonans nəzəriyyəsi psixologiyada insan davranışlarını izah etmək üçün geniş şəkildə istifadə olunur. Koqnitiv dissonans vəziyyətində olan insanlar, bu narahatlığı azaltmaq üçün ya dəyərlərini dəyişir, ya da davranışlarını əsaslandırırlar. Bu yanaşma xüsusilə qeyri-etik davranışları izah etmək üçün əhəmiyyətlidir, çünki insanlar özlərini haqlı çıxarmaq üçün yanlış əməllərinə bəhanələr tapırlar”.
O deyib ki, insanlar öz əməllərinə haqq qazandırmaq üçün fərqli strategiyalardan istifadə edirlər:
"İnsanlar öz əməllərinə haqq qazandırmaq üçün fərqli strategiyalardan istifadə edirlər. Minimallaşdırma (əməlin əhəmiyyətini kiçiltmək), digərlərinə aid etmə (başqalarının da belə davrandığını əsas gətirmək) və labüdlük (qayda pozuntusunun başqa çıxış yolu olmadığını düşünmək) kimi üsullar rasionalizasiyanın müxtəlif formalarıdır. Bu mexanizmlər sayəsində insanlar öz əməllərinin əslində qeyri-etik olduğunu qəbul etmədən onları davam etdirirlər”.
Şahanə Ziyad
Şahanə Ziyad
