Nəqliyyat,
Rabitə və Yüksək Texnologiyalar Nazirliyi yanında Elektron Təhlükəsizlik Xidməti
(ETX) "Ghosty” tətbiqi ilə bağlı "Facebook” komandasına birbaşa müraciət edib.
AZXEBER.COM xəbər verir ki, müraciət əsasında
son günlər ölkəmizdə, eləcə də xaricdə "Instagram” sosial şəbəkəsinin istifadəçilərinin
böyük narahatlığına səbəb olan, istifadəçilərin məxfilik hüquqlarını və
"İnstagram”ın gizlilik qaydalarını pozan "Ghosty” tətbiqi "Google Play store” və
"App store”dan silinib.
Naməlum tərtibatçı (developer) tərəfindən yaradılan bu tətbiq gizli "Instagram” hesablarını açmağa, istifadəçinin fərdi məlumatlarını görməyə və hesabdakı şəkilləri yükləməyə imkan verir. Tətbiq qeydiyyatdan keçərkən "Instagram” istifadəçisinin giriş məlumatlarını (loqin və parol) əldə edərək həmin hesabdakı gizli profilləri müəyyən edir. Bu gizli profillərdən hər hansı birinə baxmaq istədikdə proqram fərqli bir sessiya açaraq profilə baxmaq istəyən şəxsə gizli profili tamamilə açıq şəkildə göstərir. Dolayısı ilə, bu tətbiqdən istifadə edərək loqin və parolunu təqdim edənşəxslər öz hesabındakı gizli profillərə baxılması üçün digər "Ghosty” istifadəçilərinə icazə verirlər.
Tətbiqin populyarlığı artdıqca açılan gizli
profillərin sayı da çoxalır. Xarici mənbələrin məlumatına görə, tətbiq istifadəyə
verildiyi andan etibarən "Google Play store” üzərindən 500,000 dəfədən çox yüklənilib.
"Instagram”ın istifadəçilərə profili gizli
saxlamaq və yalnız təsdiq edilmiş izləyicilərə paylaşımları, şəkilləri və ya
videoları görməyə icazə vermək kimi seçim imkanı verdiyini nəzərə alsaq, bu, istifadəçilərin
məxfiliyinin ciddi şəkildə pozulması deməkdir. Eyni zamanda, "Instagram”
istifadə şərtlərinə görə, istifadəçilər öz hesabları üzərindən digər istifadəçilərə
hüquqlarını ötürə bilməzlər.
Elektron Təhlükəsizlik
Xidmətinin müraciətindən sonra "Facebook” komandası "Google” ilə birlikdə
araşdırma aparıb, nəticədə tətbiq "Google Play store” və "App store”dan silinib. "Facebook” rəhbərliyinin rəsmi məlumatına
görə, "Instagram” qaydalarını pozan bu tətbiqi, eləcə də "Instagram”la bağlı
qanunsuz fəaliyyəti dərhal dayandırması üçün "Ghosty” tətbiqinin tərtibatçısına
rəsmi xəbərdarlıq göndərilib. Hazırda bu şəxsin məsuliyyətə cəlb edilməsi üçün
"Facebook” tərəfindən tədbirlər görülür və təhlükəsizlik tədbirləri gücləndirilir.
ETX vətəndaşlara bu cür qeyri-rəsmi tətbiqləri yükləməməyi, giriş məlumatları kimi həssas məlumatları təqdim etməməyi, özlərinin və ətrafının məxfiliyini təhlükə altında qoymamağı tövsiyə edir.
Vətəndaşlardan bu kimi hallarla qarşılaşdıqda Elektron Təhlükəsizlik Xidmətini məlumatlandırmaları xahiş olunur.
