Milli Televiziya və Radio Şurasının sədri Nuşirəvan Məhərrəmli iyunun 4-də “Media forum” saytının suallarını cavablandırıb. AZXEBER.COM portalı həmin müsahibəni təqdim edirik:
- Ötən həftə Sloveniyada Avropa Şurası dövlətlərinin televiziya və radio yayımı üzrə tənzimləyici qurumlarının illik toplantısında iştirak etmisiz. Toplantıda nələr müzakirə edildi? - Bu, tənzimləyici qurumlarının illik tolantısıdır. İldə iki dəfə keçirilir. Toplantının qərarları üzv ölkələr üçün məcburi deyil, tövsiyə xarakterlidir. Burada televiziya və radio yayımı ilə bağlı mövcud problemlər müzakirə olunur. Ən çox müzakirə olunan məsələlər yeni media, televiziyanın, internetin imkanlarının birləşdirilməsi, rəqəmsal yayıma keçid, teleradio yayımında ictimai maraqların izlənməsi, gözlənilməsidir. Son iclasda da sadalananlara, xüsusilə bu sahədə hüquqi məsələlərə toxunuldu. - Bu istiqamətdə qanunvericilik bazası işlənirmi, hər hansı nəzarət mexanizminin tətbiqi gözlənilirmi? - EPRA-nın (Avropa Şurasına üzv dövlətlərin televiziya və radio yayımı üzrə tənzimləyici qurumlarının beynəlxalq təşkilatı – red.) toplantısında ciddi müzakirə edilən əsas məsələlərdən biri məhz hüquqi tənzimlənmədir. İnternet mediası tənzimlənsin, yoxsa tənzimlənməsin? Hazırda heç bir tənzimləmə mexanizmi yoxdur. Belə bir mexanizmi tətbiq etmək də asan məsələ deyil. Avropa ölkələri birlikdə qərar verməlidir. Televiziya efir, kabel, internet, mobil cihazlar vasitəsi ilə yayımlanan fəaliyyət sahəsidir. Birinin tənzimlənib digərinin tənzimlənməməsi sual doğurur. Bir qayda tətbiq edilməlidir. Bu suallar hələ ki, cavabsızdır. Avropa Şurasında da müzakirələr davam edir. Azərbaycan hökuməti bununla bağlı hər hansı sənəd üzərində işləmir. - Bəs özünüz internet televiziyasının imkanlarını necə qiymətləndirirsiniz? - Hesab edirəm ki, internetlə televiziyanın imkanları getdikcə birləşəcək. Bunun üçün vahid mexanizmlər işlənəcək. - Ölkədə rəsmi internet televiziyası varmı? - İnternet televiziyalarının sayı çoxdur. Amma hamısı həvəskar qismində çıxış edir. - Ölkədə xarici radiokanalların FM dalğasında yayımlanması üçün hər hansı danışıqlar gedirmi? - Bu məsələ birdəfəlik həllini tapıb. Ölkədə hüquqi bərabərlik yaratdıq. Əvvəllər bir neçə ölkənin radiokanalı yayımlanırdı. Bəzi ölkələr də bu hüquqdan istifadə etmək istədilər. Ona görə də xarici ölkələr üçün yayım hüququ tamamilə ləğv edildi. “Televiziya və radio yayımı” haqqında qanunda göstərilir ki, Azərbaycan Respublikasına aid tezliklərdə yalnız milli yayımçılar fəaliyyət göstərə bilər. - May ayının 1-dən milli telekanallarda xarici serialların yayımına qadağa qoyuldu, yerli istehsalın yayımına başlanıldı. Yerli istehsalın inkişafına dəstək məqsədilə dövlət vəsait ayrılıb. Keyfiyyətə necə, nəzarət varmı? - Arzulayırıq ki, ayrılan vəsaitlə keyfiyyətli seriallar ortaya qoyulsun. Amma son sözü tamaşaçılar deyəcək, keyfiyyətlidir, ya yox. Tamaşaçı zövqü telekanalları keyfiyyətli məhsul təqdim etməyə sövq edəcək. Yalnız keyfiyyətli məhsul onlara reytinq və reklam gətirə bilər. Telekanallar arasında yaranan rəqabət onları daha məsuliyyətli çalışmağa məcbur edəcək. - Bir müddət öncə Milli Televiziya və Radio Şurası quruma əlavə səlahiyyətlərin verilməsini istəmişdi. Konkret hansı səlahiyyətlərdən söhbət gedir? - İctimaiyyətin maraqları ilə üst-üstə düşməyən, milli-mənəvi dəyərlərə uyğun olmayan verilişlərin müvəqqəti olaraq dayandırılması üçün səlahiyyət istəmişik. Bu üsulları tətbiq etməklə televiziyaları həmin verilişləri hazırlanmaqdan çəkindirmək mümkündür. Amma bu barədə hələ ki, yenilik yoxdur.
