AZXEBER.COM xəbər verir ki, İranın Bakıdakı səfiri Müctəba Dəmirçilu Ərdəbilin valisi Məsud İmami Yegane ilə görüşündə hər iki ölkə investorlarının müxtəlif sahələrə, xüsusilə kənd təsərrüfatına sərmayə yatırmağa maraqlı olduğunu bildirib.
O qeyd edib ki, bu çərçivədə dəmir yolu yük terminalının yaradılması məsələsi Bakıda izlənəcək.
Səfir əlavə edib ki, Ərdəbil vilayəti ilə Azərbaycan Respublikası arasında mövcud ortaq cəhətlər nəzərə alınaraq, iqtisadi, mədəni və tranzit istiqamətində müxtəlif mövzular Azərbaycan tərəfi ilə müzakirə olunacaq və gündəmdə saxlanılacaq.
Ərdəbilin valisi Məsud İmami Yegane də görüşdə bu vilayətlə Azərbaycan arasında siyasi, iqtisadi, mədəni və tranzit əməkdaşlığının inkişafı yollarına toxunub. O deyib ki, Ərdəbil vilayəti Azərbaycan Respublikası ilə ən uzun ortaq sərhədə malikdir və bu ölkə ilə iqtisadi, mədəni və tranzit əməkdaşlığın genişləndirilməsi vilayətin prioritetlərindəndir.
Ərdəbil valisi logistika dəmir yolu terminalının işə salınmasını hər iki tərəfin xeyrinə hesab edib və əlavə edib ki, Azərbaycanın qonşu ölkə kimi yanaşması və qarşılıqlı münasibətlər həmişə dostluq əsasında olub. Onun sözlərinə görə, dəmir yolu terminalının istifadəyə verilməsi ilə tərəflər arasında idxal və ixracın həcmi artacaq.
Qeyd edək ki, İran və Azərbaycan prezidentləri arasında əldə olunmuş razılaşmaya əsasən, Azərbaycan dəmir yolunun xətti İran ərazisində Parsabadadək uzadılacaq və gələcəkdə Ərdəbil–Parsabad dəmir yolu vasitəsilə İranın ümumi dəmir yolu şəbəkəsinə birləşdiriləcək.
Bu layihənin həyata keçirilməsi və Parsabad terminalının inşası ilə həmin ərazi İranın və region ölkələrinin ixrac və tranzit yüklərinin toplanması və daşınması mərkəzinə çevriləcək. Ərdəbil vilayətinin Azərbaycan Respublikası ilə təxminən 380 kilometr ortaq sərhədi var və Biləsuvar gömrük keçidi bu vilayətin yeganə aktiv sərhəd keçidi sayılır.
//apa
