Bu gün “İrəli” İctimai Birliyinin 3-cü hesabat konfransı keçirilir.
Konfransda ölkənin müxtəlif bölgələrindən 600-dən çox gənc iştirak edir.
Tədbirdə çıxış edən birliyin sədri Rauf Mərdiyev bildirib ki, təmsil etdiyi qurum fəaliyyəti dövründə vətəndaş cəmiyyəti qurumları ilə daim əməkdaşlıq edib, şəffaflıq məsələsinə önəm verib: “Biz vaxtaşırı fəaliyyətimiz barədə həm üzvlərimizə, həm də ictimaiyyətə hesabat veririk. Bu cür tədbirlərin əhəmiyyəti gələcək 1 il ərzindəki strategiyamızın müəyyənləşməsi baxımından əhəmiyyətlidir”.
Gənclər və idman naziri Azad Rəhimov çıxışında deyib ki, “İrəli” vətənpərvər, dövləti sevən gənclərin təşkilatıdır. O qeyd edib ki, bu birliyin həyata keçirdiyi layihələr özünəməxsusluğu ilə daim seçilir, təşkilat isə böyüyür və gəncləşir. A. Rəhimov ictimai birliyin siyasi baxışlarında yanılmadığını da vurğulayıb: “”İrəli”çilər Azərbaycanı uğurla gələcəyə aparan şəxsi daim dəstəkləyiblər və “İlhamla irəli!” şüarını əsas tutublar”.
Yeni Azərbaycan Partiyasının (YAP) sədr müavini-icra katibi Əli Əhmədov çıxşında bəyan edib ki, bu gənclərlə ölkənin xoşbəxt gələcəyini təmin etmək mümkündür. Onun sözlərinə görə, təşkilat İlham Əliyevin prezidentliyə namizədliyini dəstəkləməklə düzgün və doğru seçim edib: “Sevindirici haldır ki, burada olan gənclərin böyük hissəsi ilk dəfədir prezident seçkisində seçici kimi iştirak edəcək. Bu ilk seçkidə İlham Əliyevi seçməklə gənclər yanılmadıqlarını görəcəklər. Mən indidən düzgün seçiminizə görə hamınızı təbrik edirəm”.
Prezident Administrasiyasının Siyasi təhlil və İnformasiya təminatı şöbəsinin müdiri Elnur Aslanov “İrəli” İctimai Birliyinin yarandığı ilk günləri xatırlayaraq, qurumun fəaliyyətini yenilikçi adlandırıb. O, Azərbaycanı Cənubi Qafqazın lideri adlandırıb: “Gənclərimiz bu seçkidə Azərbaycanın gələcəyini müəyyənləşdirməklə öz gələcəyini müəyyənləşdirir”.
Milli Məclisin deputatı Qənirə Paşayeva isə Azərbaycanın 1990-cı illərin əvvəllərindəki vəziyyəti, Heydər Əliyevin problemlərin həlli istiqamətində atdığı addımlar və dövlətçiliyin formalaşması ilə bağlı fəaliyyəti haqda danışıb.
Prezident Yanında Strateji Araşdırmalar Mərkəzinin direktoru, “İrəli” İctimai Birliyinin həmtəsisçisi Fərhad Məmmədov özünün də bir “İrəli”çi olduğunu söyləyib. O, təşkilatın vətənpərvərlik üzərində qurulduğunu da vurğulayıb.
Milli Məclisin deputatı, “İrəli” İctimai Birliyinin həmtəsisçisi Ceyhun Osmanlı bəyan edib ki, “İrəli” öz millətinin gələcəyindən ilham alaraq fəaliyyət göstərən təşkilatdır. C. Osmanlı İlham Əliyevin prezidentliyi dövründə ölkə və millət üçün gördüyü işlər haqda danışaraq, müxalifəti tənqid edib. Onun sözlərinə görə, müxalifətin sözdə birliyi kimi yaradılan qurum başqa ölkənin sifarişi ilə təsis olunub: “Biz müstəqilliyimizi heç kimə güzəştə getməyərək, şanlı tariximizi İlham Əliyevlə yazacağıq”.
Tədbirdə Ümumrusiya Gənclər İttifaqının, Pakistanın Gənclər üçün Milli Təhsil Şəbəkəsinin, Ukrayna Gənclər Assambleyasının və digər xarici ölkələrdən gələn təşkilat nümayəndələri çıxış ediblər.
Konfransda bu il keçiriləcək prezident seçkilərində İlham Əliyevin namizədliyini dəstəklənməsi ilə bağlı bəyanat qəbul olunub. /// APA
