İş vaxtında 1 saatlıq icazə yazılı olmalıdır?

SOSİAL

22:08 18.07.2026

1197

İşçilərin iş vaxtı ərzində şəxsi səbəblərlə qısa müddətlik, məsələn, 1 saatlıq işdən ayrılması halları müəssisələrdə tez-tez rast gəlinən məsələlərdən biridir.

Bəs belə hallarda icazənin mütləq yazılı şəkildə rəsmiləşdirilməsi qanunvericiliyin tələbidirmi, yoxsa bu, işəgötürənin daxili qaydalarından asılıdır?

AZXEBER.COM bildirir ki, mövzu ilə bağlı konkret.az-a danışan iqtisadçı-ekspert Əkrəm Həsənov bildirib ki, bu məsələ birbaşa Əmək Məcəlləsi ilə deyil, əsasən müəssisənin daxili əmək intizamı qaydaları və əmək müqaviləsinin şərtləri ilə tənzimlənir.

Onun sözlərinə görə, qanunvericilikdə işçinin 1 saatlıq və ya digər qısa müddətli icazəsinin hansı formada – yazılı və ya şifahi rəsmiləşdirilməsinin məcburi olduğu barədə konkret tələb yoxdur.

"Bu, hər bir müəssisənin daxili qaydaları ilə həll olunur. Eyni zamanda əmək müqaviləsində də bununla bağlı müddəalar nəzərdə tutulur. İcazə həm yazılı, həm də şifahi şəkildə verilə bilər. Bu, müəssisənin daxili intizam qaydalarından asılıdır. Əmək Məcəlləsində bu məsələnin necə rəsmiləşdirilməli olduğu birbaşa göstərilməyib. Qaydalar müəssisədaxili sənədlərlə tənzimlənir”, – deyə ekspert vurğulayıb.

Əkrəm Həsənov qeyd edib ki, bəzi işəgötürənlər gələcəkdə yarana biləcək mübahisələrin qarşısını almaq və iş vaxtının uçotunu düzgün aparmaq məqsədilə qısa müddətli icazələrin yazılı ərizə və ya elektron müraciət əsasında rəsmiləşdirilməsini tələb edirlər. Bu yanaşma hüquqi baxımdan mümkündür və müəssisənin daxili intizam qaydalarına uyğun olduğu halda tətbiq edilə bilər.

Ekspertin fikrincə, işçi və işəgötürən arasında bu kimi məsələlərin əvvəlcədən müəyyən edilmiş daxili prosedurlar əsasında həll edilməsi sonradan yarana biləcək anlaşılmazlıqların qarşısını alır. Buna görə də işçilər işlədikləri müəssisənin daxili əmək intizamı qaydaları və əmək müqaviləsində nəzərdə tutulan şərtlərlə yaxından tanış olmalıdırlar.