İşçisini məzuniyyətə buraxmayan rəhbər cəzalandırılacaq - Açıqlama » Azxeber.com Azərbaycanda özəl xəbərlər, araşdırmalar, təhlillər və müsahibələrin tək ünvanı

Yay mövsümündə əmək məzuniyyəti ilə bağlı suallar daha da aktuallaşır. Bəzi işçilər müxtəlif səbəblərdən məzuniyyətə çıxmır, bəziləri isə istifadə edilməyən məzuniyyət günlərinə görə əlavə ödəniş alıb-almayacağını bilmir.

Maraqlıdır, əmək məzuniyyəti minimum neçə gün olmalıdır, hansı şəxslərin məzuniyyətə buraxılmaması yolverilməzdir və istifadə edilməyən məzuniyyətə görə əlavə ödəniş hansı hallarda edilir?

Vətəndaşların Əmək Hüquqları Liqasının sədri Sahib Məmmədov Demokrat.az-a açıqlamasında bildirib ki, Konstitusiyaya əsasən, illik minimum əmək məzuniyyəti 21 təqvim günüdür və bundan az müəyyən edilə bilməz:

"Bununla yanaşı, Əmək Məcəlləsində müxtəlif kateqoriyadan olan işçilər üçün fərqli məzuniyyət müddətləri nəzərdə tutulub. Məsələn, fəhlə peşələri üzrə çalışanlar üçün əsas əmək məzuniyyəti 21 gün, qulluqçu kateqoriyasına aid olan mühəndis, texnik və digər işçilər üçün 30 gündür. Pedaqoji heyətə 56 gün, Vətən qarşısında xüsusi xidmətləri olan şəxslərə 46 gün, əlilliyi olan şəxslərə isə əlillik dərəcəsindən asılı olmayaraq 42 gün əmək məzuniyyəti verilir. Yəni qanunvericilikdə əmək məzuniyyətləri işçilərin kateqoriyalarına uyğun şəkildə təsnifatlaşdırılıb.

Bundan başqa, əlavə əmək məzuniyyətləri də mövcuddur. Bu imtiyaz əsasən 21 və 30 günlük məzuniyyət hüququ olan işçilərə şamil edilir. Əlavə məzuniyyətlərin dörd əsas növü var: əmək stajına görə, zərərli əmək şəraitində işləməyə görə, 14 yaşınadək iki və daha çox uşağı və ya əlilliyi olan uşağı olan qadınlara verilən əlavə məzuniyyət, eləcə də Qarabağda bərpa və quruculuq işlərində çalışan şəxslərə verilən əlavə məzuniyyət”.

Sahib Məmmədov əlavə edib ki, əsas məzuniyyət növləri bunlardır:

"Əgər qanunvericiliklə nəzərdə tutulan hallarda işçiyə məzuniyyət verilmirsə, bu, əmək qanunvericiliyinin pozulması hesab olunur. Əmək müqaviləsi ilə çalışan şəxslərə məzuniyyət verilmədiyi halda bu məlumat elektron əmək müqavilələri alt sistemində görünür və Dövlət Əmək Müfəttişliyi həmin işəgötürəni buna görə cərimələyə bilər. Lakin işçilər əmək müqaviləsi olmadan çalışdırılırsa, onların təkcə məzuniyyət hüququ deyil, ümumilikdə əmək qanunvericiliyi ilə təmin olunan digər hüquqları da pozulmuş olur. Bu məsələ kifayət qədər genişdir. Əmək Məcəlləsinin müvafiq maddələrində əmək məzuniyyətinin müddətləri və hansı kateqoriyadan olan işçilərin hansı hüquqlara malik olduğu ətraflı şəkildə göstərilib”.