Son günlər İsrail Suriyaya qarşı hərbi əməliyyatlar həyata keçirir və bu iki ölkə arasında iğtişaşlar baş verir.
Bunun fonunda müvəqqəti hökumətin prezidenti Əhməd Əl-Şəra paytaxt Dəməşqi tərk etmək məcburiyyətində qalıb.
Bəs, İsrail niyə bu dəfə Suriyanı hədəf seçib? Həmin regionda proseslər necə davam edə bilər?
Mövzu ilə bağlı AZXEBER.COM-a açıqlama verən AĞ Partiya sözçüsü, siyasi ekspert Cavanşir Abbaslı deyib ki, İsrail bu cür addımları ABŞ-yə güvənərək atır:
"İsrailin Amerikanın arxa baxçası olduğu bütün dünyaya məlumdur. Son 12 günlük İsrail-İran savaşı bu dediyimizi növbəti dəfə təsdiqlədi. Bu dəfə İsrail Amerikaya tam şəkildə arxalanıb bu addımı atdı. Açığı bunu İsrail-Suriya savaşı adlandırmaq sadəlövhlük olardı. Bu birbaşa Amerika+İsrail-Türkiyə müharibəsidir. Proseslərin sonunda Türkiyə savaşa qoşulsa, bu heç kəsə təəccüblü gəlməməlidir. Amma hesab edirəm ki, bu qarşıdurma o həddə çatmayacaq. Sadəcə Türkiyənin Suriyadakı son qalibiyyətini və Əl-Şarani iqtidara gətirməsini Qərb müttəfiqləri qəbul edə bilmir. Onun üçün də bu yola əl atıblar. Colaninin son davranışları da onu göstərir ki, tam olaraq kürəyini Türkiyəyə söykənib. Zatən bu da məlum idi. Proseslər istənilən halda qardaş ölkənin xeyrinə gedir. Onun üçün də narahat olmağa dəyməz. Suriyada yeni qurulan hökumətin ömrü çox uzun çəkəcək. Çünki, burada Türkiyə faktoru var, eyni zamanda, Ankaranın Moskva ilə yaxın əlaqələri mövcuddur. Türkiyə Müdafiə Nazirliyinin son proseslərdən sonrakı açıqlaması onu göstərir ki, ehtiyac yaransa, Suriyada qurulan son hakimiyyəti qorumaq üçün Ankara ordusu ilə müdaxilə də edə bilər".
Politoloq hesab edir ki, Yaxın gələcəkdə də Suriyada sabitliyi tam bərqərar etmək mümkün olmayacaq:
"Bir sözlə, Suriyada vəziyyətin heç də ürəkaçan olmadığı açıq görünür. Bu da gözlənilən idi. Çünki, kök salmış bir Əsəd rejimi tarix olub, yerinə Türkiyənin dəstək verdiyi bir şəxs iqtidara gətirilib. Yaxın gələcəkdə də Suriyada sabitliyi tam bərqərar etmək mümkün olmayacaq. Amma Türkiyə sona qədər dirəşəcək və uzun zaman alsa da, sonunda istəyinə nail olacaq. İsrail sadəcə əvvəldə dediyim kimi də, Amerikanın Türkiyənin qazandığı bu uğurla barışa bilmədiyinin mesajını verir. Lakin hesab edirəm ki, İran qarşısında aldığı zərbələri bu dəfə də alacaq. Sadəcə bu bölgədə hər bir iddiası olan güc mövqe savaşına girib və digər güclər üzərində üstünlük qazanmağa çalışır. Suriya üzərində tək hakimiyyətli Türkiyəni heç bir güc qəbul etmək istəmir. Onun üçün də Colani iqtidarı tez-tez bu cür hallarla üzləşəcək, amma hər dəfəsində də Ankaranı yanında görəcək. Necə ki, görməkdədir".
Mikayıl Mirzəzadə
