İsrail həbsxanalarında saxlanılan fələstinlilərin sayının 10 min 800 nəfərə yüksəldiyi açıqlanıb.
AZXEBER.COM xarici mətbuata istinadən xəbər verir ki, Fələstin Azadlıq Təşkilatına (FAT) bağlı Məhbuslar və Azad Edilənlər Nümayəndəliyi və Fələstinli Əsirlər Dərnəyinin birgə bəyanatında İsrail həbsxanalarında saxlanılan fələstinlilərlə bağlı məlumat verilib.
2025-ci ilin iyul ayına qədər İsrail həbsxanalarında saxlanılan fələstinlilərin sayının 10 min 800-ə yüksəldiyi və İsrail ordusuna aid düşərgələrdə saxlanılan fələstinlilərin bu rəqəmə daxil olmadığı bildirilib.
Qeyd edilib ki, bu rəqəm 2000-2004-cü illər arasında Əl-Əqsa İntifadası kimi tanınan İkinci İntifadadan sonra qeydə alınan ən yüksək göstəricidir.
Həmçinin bildirilib ki, İsrail həbsxanalarında 2-si Qəzzadan olan 50 fələstinli qadın və 450-dən çox uşaq saxlanılır.
İsrail tərəfindən heç bir ittiham və mühakimə olunmadan həbsxanada saxlanılan "inzibati məhbus” kimi tanınan fələstinlilərin sayının 3629 nəfər olduğu vurğulanıb.
Bildirilib ki, İsrail həbsxanalarında "qeyri-qanuni döyüşçü” kimi təsnif edilən 2454 fələstinli var.
İsrail ordusunun düşərgələrində saxlanılan qəzzalıların bu saya daxil olmadığı bildirilib.
Gülay
