İsrail və HƏMAS arasında danışıqlar prosesində Qətər və Misirdən olan vasitəçilər Qəzza zolağında hərbi əməliyyatların başa çatması üçün beş-yeddi il müddətinə atəşkəsin elan edilməsini nəzərdə tutan yeni təklif irəli sürüblər.
Bu barədə BBC məlumat yayıb.
HƏMAS-ın yüksək rütbəli nümayəndəsinin məlumatına görə, plan 2023-cü il oktyabrın 7-də HƏMAS-ın girov götürdüyü bütün israillilərin İsrail həbsxanalarında olan fələstinli məhbuslarla mübadiləsini nəzərdə tutur.
Həmçinin beş-yeddi il müddətinə atəşkəs İsrail qoşunlarının Qəzza ərazisindən tam çıxarılmasını və döyüş əməliyyatlarının dayandırılması barədə rəsmi şəkildə elan edilməsini tələb edəcək.
Eyni zamanda, HƏMAS hərəkatı vasitəçilərə anklavda hakimiyyətdən imtina etməyə və idarəetməni Fələstində başqa siyasi qüvvəyə, məsələn, Fələstin Milli Administrasiyasına və ya hər hansı bir yeni təşkilata ötürməyə hazır olduğunu bildirib.
\Report
