İsrail ordusu iki gün ərzində Suriya ərazisində 300-ə yaxın hədəfi vurub.
AZXEBER.COM xarici KİV-ə istinadən xəbər verir ki, son məlumatlara görə, İsrail tankları Dəməşqin 25 kilometrliyinə yaxınlaşır.
İsrailin hücumları nəticəsində Suriya ordusuna aid döyüş gəmiləri və təyyarələri ciddi ziyan görüb.
Məlumata görə, Suriya ordusuna aid 3 hava bazası güclü hücuma məruz qalıb və hərbi dəniz bazalarına edilən hücumlarda donanma itki verib.
Bölgədəki təhlükəsizlik mənbələri İsrail ordusunun Suriyanın cənubuna hücumunun paytaxt Dəməşqdən təxminən 25 kilometr cənub-qərbə çatdığını bildirib.
İsrail ordusunun sözçüsü Daniel Haqari iddiaları təkzib edib. O, İsrail qüvvələrinin bufer zonasından kənara çıxmadığını iddia edib.
Daxil olan məlumatlar göstərir ki, Latakiyada dəniz raketləri daşıyan gəmilər İsrailin hücumlarına məruz qalıb.
İsrail Hərbi Hava Qüvvələri Suriya ordusuna qarşı onlarla tank, təyyarə və hərbi helikopterlərlə hücumların təşkil edildiyini açıqlayıb.
İsrail eyni zamanda Dəməşqin Suriya Elmi Tədqiqat və Araşdırma Mərkəzinin ofisinin yerləşdiyi Barzeh bölgəsini də vurub.
Yerli mənbələr İsrail ordusunun Dəməşq çölündə Ədra şəhəri yaxınlığında Suriya ordusunun silah anbarını da hədəfə aldığını bildirib.
