"İslahatçı Gənclər" İctimai Birliyi və İstanbul Aydın Universitetinin birgə təşkilatçılığı ilə "Xocalıya ədalət” kampaniyası çərçivəsində universitetdə "Xocalı–30” adlı fotosərginin açılışı keçirilib.
AZXEBER.COM xəbər verir ki, Xocalı soyqırımının 30-cu ildönümünə həsr edilmiş fotosərgidə Xocalıda yaşanan dəhşətlər, azərbaycanlılara qarı törədilmiş qətliamları əks etdirən fotolar nümayiş olunub.
Sərginin açılışında iştirak edən İGİB-in sədri Fərid Şahbazlı, İstanbul Aydın Universitetinin prorektoru Zəfər Arslan, Azərbaycanın İstanbuldakı baş konsulluğunun diplomatı Cəlal Atayev Xocalı soyqırımında azərbaycanlılara qarşı törədilən vəhşiliklərdən söz açaraq baş verən hadisəyə dünya tərəfindən hüquqi və siyasi qiymət verilməsinin zəruriliyinə diqqət çəkiblər.
Natiqlər qeyd edib ki, 44 günlük Vətən müharibəsində ölkəmizin qazandığı böyük zəfərdən sonra Azərbaycanın ərazi bütövlüyü uğrunda həyatını itirən bütün şəhidlərimizin ruhu şaddır.
Onlar bildirib ki, Xocalıda baş verən dəhşətlərin dünya ictimaiyyətinin diqqətinə çatdırılması işində Heydər Əliyev Fondunun vitse-prezidenti Leyla Əliyevanın reallaşdırdığı "Xocalıya ədalət” kompaniyasının mühüm rolu var.
Çıxışçılar qeyd edib ki, Türkiyə ictimaiyyəti və türk gəncliyinin Xocalıda baş verən dəhşətləri dərindən araşdırması gələcək üçün önəmli faktdır.
Daha sonra çıxış edən Azxeber.com saytının baş redaktoru Hacıbəy Heydərli, hüquq müdafiəçisi Əhməd Şahidov, Cavid Zeynalov və universiteti təmsil edən müəllimlər Xocalıda yaşananların bir insanlıq cinayəti olduğunu qeyd ediblər.
Natiqlər bildirib ki, Xocalıda baş verənlərə zamanında lazımi hüquqi və siyasi qiymət verilmədiyindən bu gün dünyanın müxtəlif ölkələrində uşaqlar, yaşlılar, qadınlar zorakılıqlara məruz qalır.
Çıxışçılar qeyd edib ki, Xocalı soyqırımı bu il böyük kədərlə yanaşı, eyni zamanda böyük qürur hissi ilə anılır. Çünki 44 günlük Vətən savaşında Ali Baş Komandan İlham Əliyevin rəhbərliyi altında Azərbaycan öz tarixi torpaqlarını bərpa edib. Daha sonra sərgiyə baxış keçirilib. Azərbaycandan gələn nümayəndə heyəti Türkiyə universitetinin tələbə və müəllimlərinə fotoların dili ilə Xocalıda yaşanan dəhşətləri anladıblar.
