AZXEBER.COM xəbər verir ki, vəzifə müddəti bitdiyi üçün kafedra müdiri vəzifəsindən kənarlaşdırılan A.Kərimova ilə bağlı sosial şəbəkələrdə tələbələr öz etirazlarını bildiriblər. Onlardan bəziləri müəllimələrinin fotolarını profil şəkili edərək mövcud qərarın haqsızlıq olduğunu qeyd ediblər. 

Tələbələr xanım müəllimənin Jurnalistika fakültəsi üçün son 4 ildə çox böyük işlər gördüyünü yazıblar. 

Keçmiş kafedra müdiri isə açıqlamasında səhhətində problem yarandığını və istirahətə ehtiyacı olduğunu bildirib: "Onlar əslində tələbəm yox, mənim həmkarlarımdır. Onların sözləri, arzuları mənim üçün dəyərlidir. Bir daha əmin oluram ki, deməli, bu ömrü boşuna yaşamıram. Hər kəsə dərin minnətdarlığımı bildirirəm".

Qeyd edək ki, BDU-nun mətbuat xidməti Aynur Kərimovanın kafedra müdirliyindən getməsini keçirilmiş seçki ilə əsaslandırıb. Mətbuat xidməti bildirib ki, bu vəzifə seçkili olduğuna görə hər 4 ildən bir müsabiqə elan olunur. Bu il də Bakı Dövlət Universitetində vakant olan bir neçə kafedra müdiri vəzifəsini tutmaq üçün müsabiqə elan olunub. Həmin kafedranın müdiri vəzifəsini tutmaq üçün 2 nəfər - dosent Aynur Kərimova və filologiya üzrə elmlər doktoru Allahverdi Məmmədli sənədlərini təqdim edib.

Mövcud təlimata uyğun olaraq, bu məqsədlə fəaliyyət göstərən xüsusi komissiyada gizli səsvermə yolu ilə seçki keçirilib və nəticələrə görə, Allahverdi Məmmədli kafedra müdiri seçilib.