Son illərdə kirayə mənzil bazarında müşahidə olunan qiymət artımı həm kirayəçilərin, həm də ev sahiblərinin diqqət mərkəzindədir. Qiymətlərdə mövsümdən asılı olaraq müəyyən dəyişiklik olsa də, ciddi ucuzlaşma müşahidə olunmur.
Bəs kirayə bazarında bahalaşma nə vaxta qədər davam edə bilər və mənzil kirayələmək üçün ən sərfəli dövr hansı zamandır?
AZXEBER.COM xəbər verir ki, mövzu ilə bağlı Bizim.Media-ya danışan əmlak məsələləri üzrə ekspert Elnur Azadov bildirib ki, hazırda kirayə bazarında qiymətlərin nisbətən aşağı olduğu dövr yaşanır:
"Təxminən iyunun 15-dən iyulun sonunadək qismən ucuz dövrdür. Bu, tələbələrin böyük şəhərlərdən, xüsusilə Bakı, Sumqayıt və Gəncədən doğma rayonlarına qayıtması ilə əlaqədardır. Nəticədə kirayə mənzillər boşalır, bazarda təklif artır. Təklifin çox olduğu ərazilərdə qiymətlər də müəyyən qədər stabilləşir. Lakin avqustun ikinci yarısından başlayaraq oktyabr ayınadək bazarda vəziyyət dəyişir. Bu dövrdə həm uyğun mənzil tapmaq çətinləşir, həm də kirayə qiymətləri xeyli yüksəlir. Buna görə də hazırkı dövr kirayə mənzil axtarmaq üçün ən optimal vaxt hesab olunur”.
Ekspert deyib ki, bağ evləri bazarında isə vəziyyət əksinədir:
"İyunun 15-dən avqustun 15-dək olan müddət bu seqment üçün ən bahalı dövr sayılır. Qiymətlər tələbata və yerləşdiyi əraziyə görə dəyişir”.
Elnur Azadovun fikrincə, Bakıda ən ucuz kirayə mənzillər əsasən Abşeron rayonu, Qobu və şəhərin kənarında yerləşən qəsəbələrdə olur:
"Bu ərazilərdə birotaqlı mənzillərin aylıq kirayəsi orta hesabla 200 manatdan, ikiotaqlı mənzillər təxminən bu səviyyədən, üç və dördotaqlı mənzillər isə 300 manatdan başlayır. Şəhər mərkəzinə yaxınlaşdıqca qiymətlər artır.
Hazırda ən yüksək kirayə qiymətləri "Sea Breeze", Ağ Şəhər və paytaxtın mərkəzi hissəsində müşahidə olunur. "Sea Breeze"də bir mənzilin aylıq kirayəsi təxminən 1000 dollardan başlayır. Ağ Şəhərdə və şəhərin mərkəzində isə bir mənzilin aylıq kirayə haqqı 700 manatdan başlayır”.
