"Beynəlxalq Kitab Sərgisinə getmək üçün yarım saat Elmlər metrosunun girişində, yarım saat çıxışında gözləsəm də, ödənişsiz avtobuslar ortada yoxdur".
AZXEBER.COM xəbər verir ki, bu sözləri tanınmış videobloger Sərxan Rüstəmov sosial media hesabında yazıb.
O Bakıda keçirilən Beynəlxalq Kitab Sərgisinə getmək üçün ödənişsiz avtobus tapmadığını deyib:
"Hörmətli təşkilatçılar, qrafik paylaşmısınız, bir zəhmət əməl olunmasına nəzarət edin, camaatı avara qoymayın. Onsuz da insanlarda kitaba sevgi azdır, olanı da siz öldürməyin".
Tanınmış yazıçı və jurnalist Dilqəm Əhməd də həmin problemdən şikayətlənib: "Eyni şeyi Koroğluda yaşadım. Heç bir işarə yox idi, bilən də yox idi. Nəhayət, bir polis tapdım, o aparıb göstərdi. Hamı avara qalmışdı".
Yazıçı Kənan Hacı da eyni məsələyə münasibət bildirib: "Dünən Koroğlu metrosunun yanında da yox idi. Məcbur olub taksi ilə gedəsi oldum".
Sosial media istifadəçisi Rita Məcidova isə yazıb: Bəli, çox bərbad təşkil ediblər servis xidmətini. Bu dəqiqə Koroğluda gözləyirəm. Avtobusun yerini zorla tapmışam. Tapıb oturmuşam 20 dəqiqədir. Təkrar düşürdüblər ki, bu avtobus Elmlərə getməlidir. İnsanların əsəbləri ilə oynayırlar".
Şəhriyar Laçınov da nəqliyyat problemindən şikayətlənib: Elmlərdə 5 nəfərdən soruşdum, 28-i 15 dəqiqə fırlanmışam. 3 marşrut sürücüsündən soruşdum, eyni şeyi dedilər: "Hamı onları soruşur, keçən il var idi, bu il yox. Bir azdan da deyəcəklər: "Kitab sərgisinə maraq yoxdur".
Xatırladaq ki, Mədəniyyət Nazirliyinin təşkilatçılığı ilə Bakı Ekspo Mərkəzində XI Bakı Beynəlxalq Kitab Sərgisi keçirilir. Rəsmi məlumatda qeyd edilirdi ki, sərgi zamanı gün ərzində ziyarətçilərin metronun "Elmlər Akademiyası”, "28 May” və "Koroğlu” stansiyalarından Bakı Ekspo Mərkəzinə xüsusi avtobuslar vasitəsilə gediş-gəlişi təmin ediləcək.
