"Mançester Yunayted"in sabiq baş məşqçisi Erik ten Haqın "Leypsiq"i çalışdırmaq ehtimalı baş tutmayıb.
AZXEBER.COM xarici mediaya istinadən xəbər verir ki, "Liverpul"un keçmiş çalışdırıcısı və hazırda "Red Bull" futbol layihəsinin rəhbəri olan Yurqen Klopp alman klubunun Ten Haqla anlaşmasının qarşısını alıb.
Məlumata görə, "Leypsiq" rəhbərliyi hazırkı baş məşqçi Marko Rozeni göndərmək və onun yerinə Ten Haqı gətirmək variantını nəzərdən keçirirdi. Klub Bundesliqada altıncı pillədə qərarlaşıb və Çempionlar Liqasının Liqa mərhələsində yalnız bir qələbə qazana bilib. Bu uğursuzluqlar rəhbərliyin yeni çalışdırıcı axtarışına çıxmasına səbəb olub.
Lakin Klopp niderlandlı mütəxəssisin təyinatını səhv qərar hesab edib və onu üç namizədlə əvəzləməyə üstünlük verib. Onun qısa siyahısında "Kristal Pelas"ın baş məşqçisi Oliver Qlasner, "Ştutqart"ın çalışdırıcısı Sebastyan Hönes və "Benfika"nın sabiq baş məşqçisi Roqer Şmidt yer alıb.
Məlumatda qeyd olunur ki, bu üç mütəxəssis "Red Bull" sistemi ilə daha əvvəl əlaqəli olub. Qlasner 2012–2014-cü illərdə "Zalsburq"da Şmidtin köməkçisi olub, Hönes isə "Leypsiq"in akademiyasında çalışıb.
