Şirkət “Sovetski”də yaşayan vətəndaşlara kredit vermir. AZXEBER.COM-un məlumatına görə, şirkətin müştərilərə təqdim etdiyi kredit şərtləri vətəndaşların narazılığına səbəb olub. Belə ki, mobil telefonların satışı ilə məşğul olan şirkət yalnız Bakı qeydiyyatı olan vətəndaşlara "0" faizlə kredit verir. Maraqlı olan fakt isə Bakı qeydiyyatı olmayan vətəndaşlara qarşı göstərilən ikili münasibətdir. AZXEBER.COM portalı məsələ ilə bağlı kiçik bir araşdırma aparıb və şirkətin apardığı kredit siyasətində bundan da biabırçı vəziyyətdə olması ilə bağlı yeni faktlar əldə edib. Belə ki, Bakı və Sumqayıtda ümumilikdə 25 filiala sahib olan şirkətin Bakının “Sovetski” məhəlləsi kimi tanınan yaşayış massivində yaşayan sakinlərə kredit verməməsidir. Etibarlı mənbənin verdiyi məlumata görə, şirkət “Sovetski”nin yaxın vaxtlarda söküləcəyini və buna görə də orada qeydiyyatda olan vətəndaşlara kredit vermədiyini bildirib. "Kontakt Mobile" şirkəti müstəqil şirkət olmasına baxmayaraq, onun Azərbaycan vətəndaşları arasında ayrı-seçkilik salması bir azərbaycanlının milli mənsubiyyətini alçatmaq kimi qiymətləndirilə bilər. Görünür, bu cür özəl şirkətlər Azərbaycanın bütövlüyü uğrunda öz siyasi iradəsini hər zaman ortaya qoyan ulu öndər Heydər Əliyevin bölgə insanlarına qarşı göstərdiyi səmimi münasibəti, prezident İlham Əliyevin bölgələrin sosial-iqtisadi durumunun yaxşılaşdırılması üçün özəl şirkətlərə göstərdiyi humanist mövqeyini heçə sayır və Azərbayacanda “bölgəçilik” siyasətini hələ də davam etdirir.
P.S AZXEBER.COM portalı olaraq bütün bu faktların qarşılığında qarşı tərəfin də fikrini portalda yayımlamağa hazırıq.
