Türkiyədə koronavirusun 3-cü dalğası apreldə gözlənilir.
AZXEBER.COM Türkiyə mətbuatına istinadən xəbər verir ki, Türkiyədə koronavirusun risk xəritəsindəki son vəziyyətə görə qırmızı, sarı və mavi kateqoriyalardakı yoluxma artımı narahatlığa səbəb olub. Mütəxəssislər epidemiyada üçüncü zirvənin aprel ayında yaşana biləcəyinə diqqət çəkərək, "artım olarsa, yenidən çox ciddi məhdudiyyətlər olacaq” deyə xəbərdarlıq ediblər.
Türkiyənin koronavirus xəritəsindəki vilayətlər 100 min nəfərdə aşkarlanan yoluxma səviyyəsinə görə 4 rəngə bölünüb. Bu xəritədə çox yüksək riskli bölgələr qırmızı rənglə göstərilir. Digər rənglərlə isə az riskli bölgələr işarələnib. Amma keçən həftəyə olan yoluxma sayına görə qırmızı olmayan vilayətlərdə də ciddi artımın müşahidə olunması yenidən qapanmaların olacağı qorxusunu gündəmə gətirdi.
Türkiyənin Gülhane Təhsil və Araşdırma Xəstəxanası Yoluxucu Xəstəliklər və Klinik Mikrobiologiya Mütəxəssisi Dos. Dr. Ümit Savaşçı son zamanlar artan xəstəlik sayı haqqında açıqlama verib.
O, aprelde koronavirusun 3-cü dalğası gələ biləcəyini diqqətə çatdırıb: "Mart ayının sonu və aprel ayının əvvəlində gündəlik yoluxma sayı 15-20 minə çata bilər. Ancaq qabaqlayıcı tədbirlər görülərsə, bu rəqəmlərə çatmayacağıq. 15 mart tarixi və ondan sonrakı günlər rəqəmlərimiz üçün çox həlledici olacaqdır. Bəli, üçüncü zirvəni yaşaya bilmərik, amma 15 martda gündəlik yoluxmaların sayında ciddi artım olsa, təəssüf ki, üçüncü zirvəyə aprel ayında çatacağıq. O zaman təbii ki, ölkədə çox ciddi məhdudiyyətlər ola bilər və təəssüf ki, itkilərimiz, xəstəxanaya yerləşdirilən xəstə sayı arta bilər".
Bununla belə Ümit Savaşçı ölkədə tam qapanmanın olmayacağı qənaətindədir: "Açığı, ölkəmizdə tam qapanma olacağını düşünmürəm. Hazırda peyvəndlənmə siyahısında dünyanın 5-ci ölkəsiyik. Buna görə də vəziyyətin bu yerə gələcəyini düşünmürəm. Amma qabaqlayıcı tədbirlərin gücləndirilməsi, vilayətlər arasında nəqliyyatın azaldılması, məktəblərin daha nəzarətli olması, xüsusilə, müəssisələrin qaydalara daha çox diqqət yetirməsi vacibdir".
Aydın Nuri
