May ayının 28-də Azərbaycanda yeni internet televiziya fəaliyyətə başlayacaq. LAF TV adlanan telekanalın təsisçiləri isə tanımış telejurnalistlər Ləman Ələşrəfqızı və Afət Telmanqızıdır.
Ləman Əliəşrəfqızı yeni layihələri haqda AZXEBER.COM-a müsahibə verib.
- Yeni internet televiziya təsis etmisiniz. İstərdik ki, bu haqda ətraflı məlumat verəsiniz...
- Biz may ayının 28-də - Cümhuriyyət günündə həmkarım Afət Telmanqızı ilə birlikdə "LAF TV" adlı internet televiziya açırıq. "LAF" sözü bizim leksikonumuzda olmasa da, türklərdə də "laf etmək" ifadəsi var. Yəni danışmaq. Bu söz bütün mənalarında bizim jurnalist missiyamıza uyğundur. Jurnalistin işi danışmaq, laf etməkdir. Həm də LAF sözündə bizim hər ikimizin adlarımızın baş hərfləri var orada. Ona görə bu adda televiziya açmaq qərarına gəldik. Tamaşaçılarımız internet vasistəsilə bizi izləyə biləcəklər.
- LAF TV-nin əsas prioritetləri nələr olacaq?
- Daha çox sosial layihələr olacaq. Proqram şəklində tamaşaçı önunə çıxacağıq. Gündə bir xəbər buraxılışı planlaşdırırıq. Onun adı "Ülgüc xəbər" olacaq. Bu həm xəbərin gücü, həm də ülgüc kimi kəskin olması deməkdir. Reportaj və sosial problemlərlə gündəmə gələcəyik. Təbii ki, günün mövzusuna uyğun olaraq müsahibələr də olacaq. Bu telekanal hər ikimiz üçün tribuna olacaq, sözümüzü deyəcəyik. Çalşacağıq ki, günün nəbzini tuta bilək və Azərbaycanın azad informasiya məkanında nəsə yadda qalan iş ortaya qoya bilək.
- Yaratdığınız kanalın bu günə qədər çalışdığınız kanallardan fərqi nə olacaq?
- "Mən şəxsən öz adıma deyirəm ki, işlədiyim hər bir kanalda hər zaman fərqli görünməyə, fərqli layihələr etməyə çalışmışam. Yəni, Ləman Ələşərəfqızı hansı xətt üzrə gedib, tanınıbsa çalışacam o dəsti-xəttimi qoruyub-saxlayım. Ancaq yenədə deyirəm ki, bizim xəbərimizin adı "ülgüc xəbər" olacaq. Daha çox cəmiyyətdə baş verən neqativlər köklənəcəyik.
- Başqa hansı tanınmışları televiziyanıza cəlb etməyi düşünürsünüz?
- Hələ ki, Afətlə ikimiz olacağıq. Bu ikimizin gücü ilə ortaya çıxan layihədir. Hələki dar bir ortamda Afət mən və bir-iki texniki işçidən ibarət olacağıq. İnsAllah böyüsək, sıralarımız da genişlənəcək.
Günel Hüseynli,
AZXEBER.COM
AZXEBER.COM
