“Erməni əsirliyində olan soydaşlarımızı azad etmək bizim borcumuzdur. Hazırki vəziyyətdə belə bir situasiyanın yaranması şans ola bilər. Hesab edirəm ki, bu istiqamətdə səlahiyyətli qurumlar tərəfindən lazımi addımlar atılacaq”.
Bu sözləri AZXEBER.COM-a Milli Məclisin deputatı Elman Məmmədovun “Həlak olmuş erməni pilotlarının cəsədlərini Xankəndində saxlanılan girovlarımız Şahbaz Quliyev və Dilqəm Əsgərovla dəyişmək lazımdır” fikrini şərh edərkən tanınmış hüquq müdafiəçisi Səidə Qocamanlı söyləyib.
Xatırladaq ki, Milli Məclisin deputatı Elman Məmmədov təklif irəli sürərək bidlirb ki, həlak olmuş erməni pilotlarının cəsədlərini Xankəndində saxlanılan girovlarımız Şahbaz Quliyev və Dilqəm Əsgərovla dəyişmək lazımdır.
Qeyd edək ki, gündəmin əsas mövzularından birinə çevrilmiş iki mühüm hadisənin həlli prosesi paralel davam edir. Bunlar biri hazırda erməni əsirliyində olan iki girov götürülmüş vətəndaşımız Şahbaz Quliyev və Dilqəm Əsgərovun taleyidir, digəri isə noyabrın 12-də Azərbaycan Silahlı Qüvvələri tərəfindən vurulmuş erməni helikopterinin qalıqlarının və meyitlərin təhvil verilməsi məsələsidir. Millət vəkilinin mövqeyini AZXEBER.COM-a şərh edən hüquq müdafiəçisi Səidə Qocamanlı bildirib ki, irəli sürülən təklifi müsbət dəyərləndirirəm: “Tarixdə belə hadisələr çox olub. Düşünürəm ki, erməni əsirliyində olan girovlarımız azad edilməlidir. Soydaşlarımızı azad etmək bizim borcumuzdur. Hazırki vəziyyətdə belə bir situasiyanın yaranması şans ola bilər. Hesab edirəm ki, bu istiqamətdə səlahiyyətli qurumlar tərəfindən lazımi addımlar atılacaq”.
Hüquq müdafiəçisi sözlərinə onu əlavə edib ki, bu işlər həm Azərbaycan qanunlarına, həm də beynəlxalq qanunların çərçivəsində həyata keçirilməlidir.
Xatırladaq ki, üç azərbaycanlı Dilqəm Əsgərov, Şahbaz Quliyev və Həsən Həsənov cari ilin iyun ayında Azərbaycanın işğal edilmiş Kəlbəcər rayonunda ermənilər tərəfindən girov götürülüb. Həsən Həsənov qətlə yetirilib, onun cəsədi Azərbaycan tərəfinə verilib.
Noyabrın 12-də isə Ağdam rayonunun Kəngərli kəndindən 1700 metr şimali-şərqdə hava məkanında hərbi kurs götürən və Azərbaycan mövqelərini atəşə tutmağa çalışan, Ermənistan SQ məxsus Mi-24 helikopteri vurulub. Azərbaycan tərəfinin açdığı atəş nəticəsində düşmən helikopteri vurulub.
“Vətəndaşlarımızın erməni əsriliyindən azad edilməsi üçün yaxşı imkan yaranıb və Azərbaycan hakimiyyəti bu şansdan istifadə etməlidir”, - Elman Məmmədov qeyd edib.
“Erməni tərəfi həlak olmuş pilotlarının qaytarılması üçün Beynəlxalq Qırmızı Xaç Cəmiyyətinə və digər beynəlxalq təşkilatlara müraciət edib. Mən Azərbaycan hakimiyyətinə erməni pilotlarının cəsədlərini Xankəndində saxlanılan, qeyri-qanuni olaraq mühakimə edilən və işgəncələrə məruz qalan iki azərbaycanlı əsirlərlə dəyişməyi təklif edirəm. Əminəm ki, Azərbaycan hökuməti məhz belə edəcək”, - deputat qeyd edib.
Azxeber.com
