V çağırış Milli Məclisə seçkilərə vaxt daraldıqca namizədlərin fəallığı xüsusi nəzərə çarpır. Bu istiqamətdə mətbuat və sosial medianın diqqətində olan əsas namizədlərdən biri Lənkəran şəhər 73 saylı dairənin namizədi Hüseyn Cavadzadədir. Lənkəranlı gənclərin bu ilki seçkilərdə favoriti olan gənc namizəd haqqında bütün Lənkəran, Xəzər Lənkəran futbol klubunun fan klubları davamlı olaraq təbliğat materialları paylaşırlar. Qısa müddət ərzində minlərlə lənkəranlını öz ətrafına toplayan gəncin seçicilərlə görüşləri, tanıtım videosu tanınmış ictimai fiqurlar tərəfindən paylaşılır və fəaliyyəti müsbət qarşılanır.
Qeyd edək ki, Hüseyn Cavadzadə eləcə də internetdə namizədlər arasında keçirilən bütün sorğularda rəqiblərindən böyük faiz fərqi ilə öndədir. Eləcə də Hüseyn Cavadzadəni dəstəkləyən lənkəranlı könüllülərdən ibarət “O səs Lənkəran üçün” qrupu xüsusi fəallıq nümayiş etdirir.
H. Cavadzadə AZXEBER.COM-a Lənkəranın doğma ünvan olduğunu diqqətə çatdırıb: “Çox sevinirəm ki, seçicilərimizlə münasibətlərimiz qarşılıqlıdır. Hər gün yüzlərlə müraciət, məktub alıram və əminəm ki, parlamentdə regionumuzu təmsil edəcəyim halda həm xalqımıza həm də dövlətimizə səmərəli fəaliyyət göstərəcəyəm. Lənkəranlıların doğrudan 5 ildən bir gözə dəyən deputata yox, daim yanlarında olacaq millət vəkilinə ehtiyacları var".
Qeyd edək ki,H.Cavadzadə 1985-ci ilin oktyabrın 17-də Bakı şəhərində ziyalı ailəsində anadan olub. Babası Cavad Cavadzadə Lənkəranın ən hörmətli ziyalı ailələrindən olub. Azərbaycanın tanınmış fiziki, professoru Moskvada təhsil alıb və ömrünün sonuna qədər Bakıda Texniki Universitetdə pedaqoji fəaliyyətlə məşğul olub. Digər babası Hacı Cəlal Hüseynov Lənkəranın tanınmış xeyriyyəçi sahibkarlarından olub.Hüseyn Cavadzadə orta təhsilini 246 saylı məktəb lisey və Azərbaycan Futurologiya İnstitutunun "Kiçik Akademiya"sında alıb. 2000-ci ildə Azərbaycan Dövlət Mədəniyyət və İncəsənət Universitetinin "Sənətşünaslıq" fakültəsinə daxil olub. Universitetin bakalavr, magistr pilləsini qırmızı fərqlənmə diplomu ilə bitirib. Hazırda doktorantdır. 2005-ci ildə Gürcüstanda İFASC-da, 2012-ci ildə Ukrayna Maliyyə Akademiyasında təhsil alıb. Hələ tələbəlik dövründə 2002-2004-cü illərdə hazırladığı layihələr sosial mövzuları əhatə edib. Onlardan biri BMT-nin beynəlxalq Sülh Forumu müsabiqəsidir ki, o, 1-ci yerə layiq görülüb. Digəri - "Əlillərin cəmiyyətə integrasiyası" mövzusunda hazırlanan layihə isə Tel-Əviv İnternational Film Festivalında ən yaxşı debüt mükafatı alıb. 2004-cü ildən "Мир Азербайджана" diaspor fəaliyyətini işıqlandıran jurnalda fəaliyyət göstərib. 2008-ci ildən Azərbaycan Dövlət Mədəniyyət və İncəsənət Universitetində pedaqoji fəaliyyətə başlayıb. 2012-ci ildən "Addım Gənclər Təşkilatı"nı təsis edib. "Addım"da fəaliyyəti zamanı gənclər arasında insan hüquqları, multikulturalizm, sağlam həyat tərzinin təbliği, gənc iqtisadçıların yetişdirilməsi, yol təhlükəsizliyi və s. mövzularda onlarla regional və beynəlxalq layihələr həyata keçirib. 2015-ci ildə Norveç Krallığının Vibro İnternational təşkilatı tərəfindən "Gənc Siyasətçı" mükafatına layiq görülüb. Bir çox beynəlxalq forum və festivalda regional münsiflər və müşahidə qrupunun rəhbəridir. Ailəlidir. Bir övladı var.
