IV "Maarifçi” tələbə-məzun təcrübə proqramının iştirakçıları Məhkəmə-Hüquq Şurasının Aparat rəhbəri Kərəm Mansurovla görüşüblər.
AZXEBER.COM xəbər verir ki, görüşdə Elm və Təhsil Nazirliyinin Aparat rəhbərinin müavini Fərzəli Qədirov, nazirliyin məsul əməkdaşları, proqramın əvvəlki illərdə uğur qazanmış məzunları və IV "Maarifçi” proqramının iştirakçıları iştirak ediblər.
Kərəm Mansurov görüşdə "Müasir məhkəmə sistemi və rəqəmsal gələcək” mövzusunda çıxış edib. O, Məhkəmə-Hüquq Şurasının fəaliyyət istiqamətləri, məhkəmə hakimiyyətinin müstəqilliyinin təmin olunması, məhkəmə mədəniyyətinin formalaşdırılması, rəqəmsal idarəetmə və süni intellektin ədalət mühakiməsində gələcək rolu barədə məlumat verib.
Bildirilib ki, müasir məhkəmə sisteminin inkişafı hüquqi bilik və peşəkarlıqla yanaşı, yüksək etik davranış standartlarının qorunması, ictimai etimadın təmin edilməsi və yeni texnologiyaların imkanlarından səmərəli istifadə ilə sıx bağlıdır.
Görüşdə həmçinin rəqəmsal gələcəyin yalnız texnoloji yenilikləri deyil, yeni düşüncə tərzini, müasir idarəetmə mədəniyyətini və dəyişikliklərə açıq insan kapitalını da əhatə etdiyi vurğulanıb.
Tədbirin sonunda iştirakçıların sualları cavablandırılıb və müxtəlif mövzular ətrafında fikir mübadiləsi aparılıb.
Qeyd edək ki, "Maarifçi” tələbə-məzun proqramı Elm və Təhsil Nazirliyinin təşəbbüsü, Təhsilin İnkişafı Fondunun dəstəyi ilə 2024-cü ildən həyata keçirilir. İndiyədək proqramdan 102 gənc məzun olub. Hazırda 53 nəfər IV "Maarifçi” proqramı çərçivəsində Elm və Təhsil Nazirliyinin struktur bölmələri və tabeliyindəki qurumlarda, regional təhsil idarələrində, həmçinin Naxçıvan Muxtar Respublikasının Təhsil Nazirliyində təcrübə keçir.
