"McDonald's Azərbaycan” şirkətinin iyunun 1-də start verilmiş "Gənc yazarlar” layihəsi çərçivəsində təşkil etdiyi tədbirdə xüsusi qayğıya ehtiyacı olan 30-dan çox uşaq iştirak etmişdir.
Tbilisi prospekti ilə Ş.Mehtiyev küçələrinin kəsişməsində, "Grand Hayat” yaşayış kompleksində yerləşən "McDonald’s” restoranında keçirilmiş tədbirin iştirakçıları üçün "Nağıl yazılması” mövzusunda ustad dərsi təşkil edilmişdir.
Tədbirdə tanınmış ictimai xadim Bəhram Bağırzadə də iştirak edib. O, bir çox uşaq kitablarının müəllifi kimi gənc yazarlara dəyərli məsləhətlər verib, onların çoxsaylı suallarını cavablandırıb. Ustad dərsinin sonunda uşaqlara xatirə hədiyyələri - yaradıcılıqla məşğul olmaq üçün ləvazimatlardan ibarət "Gənc yazar” dəsti təqdim olunmuşdur.
Ustad dərsinin təşkilatçılarının sözlərinə görə, belə görüşlər sayəsində uşaqlarda özlərinə və öz güclərinə inam artır, gizli istedadları üzə çıxır. Uşaqlar təəssüratlardan, emosiyalardan və maraqlı ideyalardan bəhrələnərək sıfırdan hekayələr yazmağı öyrənirlər. Belə ki, ustad dərsi zamanı uşaqlar gələcək nağıllarını yazmaq üçün ilk addımları atmağa çalışıb, onların qəhrəmanlarını seçib, mümkün süjetləri müzakirə ediblər.
"McDonald’s”ın CARE GROUP şirkəti ilə əməkdaşlığı çərçivəsində reallaşdırılan "Gənc yazarlar” layihəsinin əsas məqsədi xüsusi qayğıya ehtiyacı olan uşaqlara kömək etməkdir. Layihə çərçivəsində uşaqlarla "art-terapiya” üsulu ilə psixoloji təlimlər keçiriləcəkdir. Bu terapiya qorxu ilə mübarizə aparmağa kömək edir və uşaqların ümumi psixoloji vəziyyətinə müsbət təsir göstərir.
Qeyd edək ki, korporativ sosial məsuliyyət "McDonald’s” strategiyasının ayrılmaz hissəsidir. 22 ildən artıq müddət ərzində çoxlu sayda müxtəlif layihələr, o cümlədən uşaq evlərinə dəstək, tibbi yardım fondları, idman tədbirləri və digər sosial layihələr həyata keçirilib.
