Xəbər verdiyimiz kimi, bu gün azərbaycanlı jurnalistlər Brüsseldə bir sıra görüşlər keçiriblər.
AZXEBER.COM xəbər verir ki, Azərbaycanın NATO-dakı daimi nümayəndəliyinin rəhbəri Xəzər İbrahimlə görüşdən sonra, media nümayəndələri günün ikinci yarısında Azərbaycanın Belçika Krallığındakı səfiri və eyni zamanda Avropa İttifaqı yanında Nümayəndəliyinin rəhbəri Fuad İsgəndərovla da görüşüblər.
Səfirlikdə olan yazarlar səfirliyin iş fəaliyyəti ilə tanış olublar. Burada da səfir jurnalistlərə geniş müsahibə verərək, Azərbaycan-Avropa İttifaqı arasındakı münasibətlərdən danışıb. Səfir xüsusilə, Azərbaycanla Avropa İttifaqı arasında yaranmış son məsələlərə aydınlıq gətirib. Belə bir fikir ifadə olunub ki, Azərbaycanla sözügedən qurum arasındakı münasibətin nikbin gələcəyi var. Səfir əminliklə vurğulayıb ki, Avropada Azərbaycan dəyərlərinə böyük ehtiyac var. Azərbaycanın dövlət modeli yüksək qiymətləndirilir, bu əlaqələr də gələcəkdə yüksələn xətlə inkişaf edəcək.
Daha sonra jurnalistlər bir neçə saat sonra başlayacaq “Qarabağ” - “Anderlext” oyununa yola düşüblər. Oyundan sonra da media nümayəndələri mətbuat konfransında iştirak edəcəklər.
