"Media savadlılığının artırılması dünyanı düşündürən ən vacib məsələlərdən biridir. Çünki informasiyanın alınması, istehsalı, istehlakı, ötürülməsi hazırda bütün dünyada adi bir məsələyə çevrilib. İnternetin geniş yayılması, sürətli olması və xəbərlərin bolluğu adi hətta insanlarda belə media sahəsində minimum biliklərə sahib olmasını tələb edir. Digər məsələ dünyada hazırda "feyk nyus"ların, dezinformasiyaların sayının durmadan artmasıdır. Hətta süni intellektlə xəbərlər yayılır və insanlar hansı xəbərin doğru, hansı xəbərin yanlış olduğunu, hara yönəldiyini, insanları nəyə yönətdiyini anlamaqda çətinlik çəkirlər. Bu da günümüzdə hər birimizin rastlaşdığımız aktual məsələlərdən biridir".
Bu sözləri AZXEBER.COM-a açıqlamasında Milli Məclisin deputatı Vüqar İskəndərov Azərbaycanda media savadlılığının keçirilməsinin vacibliyindən danışarkən qeyd edib.
Deputat bildirib ki, media savadlılığı məsələsi təkcə jurnalistləri deyil, eyni zamanda vətəndaşlarımızı da düşündürməlidir:
"Ona görə də yalnız media işçiləri yox, vətəndaşlar da ilkin olan məsələləri, bilikləri əldə etməlidirlər və dövlətlərə belə təzyiqlərin baş verdiyi bir zamanda yaşayırıq. Böyük şirkətlər, onların nəzarətində olan qəzətlər, media orqanları hətta dövlətlərə təsir göstərirlər, cəmiyyətləri çaşdırmağa çalışırlar. Bunun içində siyasi məsələlər də var, biznes məsələləri də olur. Bunlar hər biri bir növ məlumat bolluğunda adi insandan media sahəsində çalışan peşəkar jurnalistə qədər hər birimizi düşündürən bir problemə çevrilib. Azərbaycanda 2023-ci ildə qəbul olunmuş media haqqında qanunda dövlətin bu sahəyə olan diqqəti və vacib məsələlərin həll olunması üçün görülən işlər orada təsbit olunub. Həmin qanunun 10-cu maddəsində insanların media sahəsində artırılması bağlı da nüanslar yer alıb. Onun üçün Media Agentliyinin xüsusi saytı da mövcuddur və ondan vətəndaşlar, cəmiyyətimiz media savadlılığının artırılması üçün istifadə edə bilərlər".
Millət vəkili əlavə edib ki, media savadlılığı barəsində əldə olunan biliklər media işçiləri tərəfindən cəmiyyətə ötürülməlidir:
"Fikrimizə yekun vuraraq onu qeyd etməliyik ki, bu mühüm məsələ günümüzün tələbidir. Dünya sürətlə dəyişir, informasiyanın hər birimiz həm alıcısıyıq, həm də ötürücüsüyük. Bu mənada, biz də informasiyanı ötürəndə obyektiv olmağa çalışmalıyıq. Nəyin subyektiv, obyektiv olması, həm də əlimizdə olan məlumatların da düzgünlüyündən və yaxud yanlış olduğundan asılıdır. Ona görə də biz onları ayırmaq üçün mütləq bu biliklərə sahib olmalıyıq. Ölkəmizdə keçirilən böyük bir tədbir də biliklərimizə bariz nümunədir. Orada əsasən media işçilərinin bu sahədə savadlılığının artırılması üçün çox mötəbər məlumatlar, vacib məsələlər, platforma kimi müzakirə olunurdu. Düşünürük ki, orada əldə olunan nəticələr, yeni biliklər həm də media işçiləri tərəfindən cəmiyyətimizə çatdırılmalıdır".
Mikayıl Mirzəzadə
