İtaliyanın Baş naziri Corcia Meloni bu gün Azərbaycana səfər edəcək. Meloninin Bakı səfəri İtaliyanın Cənubi Qafqaz strategiyası baxımından xüsusi əhəmiyyət daşıyır. Azərbaycan Roma üçün regionda enerji, ticarət və sənaye baxımından əsas tərəfdaşlardan biridir.
Milli Məclisin deputatı Vüqar İskəndərov AZXEBER.COM-a açıqlamasında deyib ki, bu səfər iki ölkə arasında dərin əməkdaşlıq perspektivlərini əhatə edir:
"İtaliyanın Baş naziri Corcia Meloninin Azərbaycana rəsmi səfərinin 2026-cı ilin may ayına təsadüf etməsi həm zamanlama, həm də siyasi və iqtisadi baxımdan mühüm əhəmiyyətə malikdir. Bu səfər təkcə protokol xarakterli deyil, eyni zamanda iki ölkə arasında dərin əməkdaşlıq perspektivlərini əhatə edir. Burada əsas məsələlərdən biri enerji sahəsidir. Xüsusilə qaz təchizatının artırılması və bu istiqamətdə əməkdaşlığın gücləndirilməsi diqqət mərkəzindədir. Azərbaycanın Avropanın enerji təhlükəsizliyində rolu, xüsusilə Cənubi Avropa üçün enerji qovşağına çevrilməsi ehtimalları da müzakirə oluna bilər”.
Deputat vurğulayıb ki, iki ölkə arasında ticarət dövriyyəsi artıq kifayət qədər yüksəkdir:
Azərbaycan və İtaliya arasında ticarət dövriyyəsi artıq kifayət qədər yüksək səviyyədədir. Səfər çərçivəsində yalnız neft-qaz sektoru deyil, eyni zamanda aqrar sahə, infrastruktur və texnologiya istiqamətində də yeni əməkdaşlıq imkanlarının yaranacağı gözlənilir. Bundan əlavə, sənaye və müdafiə sahəsində də əməkdaşlıq perspektivləri mövcuddur. İtaliyanın "Leonardo” kimi şirkətlərinin Azərbaycanın müdafiə sənayesində iştirak imkanları da müzakirə edilə bilər”.
Parlamentari vurğulayıb ki, siyasi baxımdan da bu səfər mühüm əhəmiyyət daşıyır:
"Siyasi baxımdan da bu səfər mühüm əhəmiyyət daşıyır. İtaliya Azərbaycanın Avropa İttifaqı çərçivəsində əsas tərəfdaşlarından biri hesab olunur və bu səfər münasibətlərin daha da möhkəmlənməsinə xidmət edə bilər. Azərbaycan Prezidentinin İtaliyaya əvvəlki səfərləri də iki ölkə arasında əlaqələrin inkişafına mühüm töhfə verib. Bu dəfəki səfər çərçivəsində tərəflər üçün maraq doğuran bir sıra vacib məsələlərin müzakirə ediləcəyi gözlənilir”.
Şahanə Ziyad
