"Rusiyanın parçalanacağı fikirlərinə inanmıram”
Bunu Milli Məclisin deputatı Rüfət Quliyev Rusiyada baş verənlərlə bağlı AZXEBER.COM-a açıqlamasında söyləyib.
Deputat bildirib ki, hadisələrin gedişi onu göstərir ki, Rusiyada vətəndaş müharibəsinin təməl daşı qoyulur:
"Rusiyadakı proses ya vətəndaş müharibəsi ilə nəticələnəcək, yaxud da V. Putini qoruyub ona tərəf çıxacaqlar. Bu vəziyyətdə isə Priqojin uduzacaq.
Ancaq mənə Rusiyada vətəndaş müharibəsi olarsa, orada yaşayan 3 milyona yaxın azərbaycanlının taleyi maraqlıdır. Mən istəmərəm ki, onlara xələl gəlsin. Rusiyadakı azərbaycanlıların 2 milyona yaxını Moskvanın vilayətlərində , 300 minə yaxını isə Sankt-Peterburq və Leninqrad vilayətlərində yaşayır.
Mən arzu edərdim ki, Rusiyada vətəndaş müharibəsi olmasın. Bu gün hələki nəticənin nə olacağını söyləmək tezdir. Qarşıdurmanın necə inkişaf edəcəyinə baxmaq lazımdır. Rusiyanın parçalanacağı fikirlərinə isə inanmıram”.
Şəbnəm Zahir
