Xəbər verdiyimiz kimi peşəkar kikboksçumuz Almaniyanın Bohum şəhərində MMA - qarışıq döyüş növləri və K1 versiyaları üzrə böyük beynəlxalq Kikboksinq turnirində qalib olub.
AZXEBER.COM xəbər verir ki, müxtəlif beynəlxalq turnirlərin qalibi, Dünya Kəmərinin sahibi Xəyal Əhmədov açıqlamasında qələbəsini torpaqlarımızın azadlığı və bütövlüyü uğrunda şəhid olmuş qəhrəman qardaş və bacılarımızın əziz ruhlarına həsr etdiyini deyib.
"Almaniyanın Bohum şəhərində MMA - qarışıq döyüş növləri və K1 versiyaları üzrə böyük beynəlxalq Kikboksinq turnirində rəqibim üzərində qələbə qazandım. Daim bizə öz dəstəyini göstərən, Azərbaycan Kikboksinq Federasiyasının prezidenti, millət vəkili Adil Əliyevə və federasiyasının rəhbər heyətinə dərin minnətdarlıqlarımı çatdırıram. Kikboksçu olmağımla qürur duyuram. Federasiyamızın daxili və xaricdə uğurları davam edir.
Beynəlxalq uğurlarımızla yanaşı, ilk dəfə olaraq kadetlər və yeniyətmələr arasında Azərbaycan birinciliyi böyük coşqu və izdihamlı keçdi. Bundan sonra da uğurlarımız davam edəcək. Bildiyiniz kimi qarşıdan aprel hadisələrinin ildönümü yaxınlaşır. Qələbəmi torpaqlarımızın azadlığı və bütövlüyü uğrunda şəhid olan qəhrəman qardaş və bacılarımızın əziz ruhlarına həsr edirəm. Uğurlarımızın arxasında onların torpaqlarımız uğrunda axan qanları durur”,-deyə idmançı bildirib.
Qeyd edək ki, "Qala turnir və böyük oyun” kimi tanınan bu yarışmaya dünyanın müxtəlif ölkələrindən yüksək səviyyəli (Mix-Fight) kikboksçular qatılıb.
X.Əhmədov Almaniyanın Bohum şəhərinin ən böyük arenasında – "RuhrCongress”də təşkil olunmuş döyüşündə də inamlı təsir bağışlayaraq almaniyalı rəqibi, MMA döyüşçüsü Fabian Wosnitza üzərində təmiz qələbə qazanıb.
Xatırladaq ki, ötən il Almaniyanın Vuppertal şəhərində A1WCC versiya üzrə keçirilmiş turnirdə X.Əhmədov erməni rəqibini nakauta salaraq parlaq qələbə qazanmışdı.
