İqtisadiyyat naziri Mikayıl Cabbarovun Gənclər və İdman Nazirliyi və Heydər Əliyev Mərkəzinin 2019-cu ildən həyata keçirdiyi "Heydər Əliyev siyasi məktəbini öyrənirik” Gənc Liderlər Proqramının iştirakçıları ilə videokonfrans formatında görüşü keçirilib.
AZXEBER.COM xəbər verir ki, açılış nitiq ilə Gənclər və İdman nazirinin müavini İntiqam Babayev cıxış edərək 2019-cu ildən başlayaraq Heydər Əliyev Mərkəzi və Gənclər və İdman Nazirliyi tərəfindən "Heydər Əliyev siyasi məktəbini öyrənirik” Gənc Liderlər Proqramının həyata keçirilməyə başladığını qeyd etmişdir. 2020-ci il üçün proqramda iştirak etmək 40 rayon və şəhərdən 350-dən artıq gəncin müraciət etdiyini vurğulamışdır. Rəhbər şəxslərlə görüşlərin gənclərin dünya görüşünün formalaşması, eyni zamanda müxtəlif sahələr üzrə həyata keçirilən dövlət siyasəti və gələcəyə baxış barədə gənclərə daha da detallı məlumat vermək məqsədi daşıdığını bildirimişdir.
Görüşdə İqtisadiyyat naziri Azərbaycanın inkişaf tarixində misilsiz rolu olan Heydər Əliyev irsinin öyrənilməsinin önəmini vurğulayıb, Ümummilli Liderin Azərbaycan iqtisadiyyatının inkişafı və dünya iqtisadiyyatına inteqrasiyası, ölkəmizə investisiyaların cəlb olunması, iqtisadi fəallığın bərpası və həyat səviyyəsinin yüksəldilməsi istiqamətində gördüyü genişmiqyaslı işlərdən bəhs edib. Heydər Əliyevin ölkəmizin sosial-iqtisadi inkişaf strategiyasının uzunmüddətli dövrə hesablandığını qeyd edən İqtisadiyyat naziri Ümmumilli Liderin təşəbbüsü ilə Azərbaycanda yeni istehsal sahələrinin qurulduğunu, bir sıra böyük sənaye müəssisələrinin məhz respublikamızda inşasına nail olunduğunu, "Əsrin müqaviləsi”nin Azərbaycanın regionda və dünyada mövqeyini möhkəmləndirdiyini, iqtisadiyyatın bütün sahələrinin inkişafına zəmin yaratdığını diqqətə çatdırıb. Heydər Əliyevin zamanın yeni çağırışlarını nəzərə almaqla həyata keçirdiyi islahatlar sahibkarlığın inkişafını, liberal iqtisadiyyatın, biznes və investisiya mühitinin formalaşdırılmasını təmin etdi. Azərbaycan beynəlxalq arenada yerini daha da möhkəmləndirdi, ölkəmizin gələcək tərəqqisi üçün möhkəm təməl yaradıldı.
Azərbaycanın hərtərəfli inkişaf strategiyasının dövlət başçısı cənab İlham Əliyev tərəfindən böyük uğurla davam etdirilməsi nəticəsində ölkəmiz iqtisadi baxımdan regional liderə, Avropa və Asiya arasında əsas nəqliyyat-logistik mərkəzlərdən birinə çevrilib. Təsadüfi deyildir ki, Azərbaycanın uğurları nüfuzlu beynəlxalq təşkilatların hesabatlarında xüsusi olaraq qeyd edilir.
Ölkəmizin sosial-iqtisadi inkişafında və beynəlxalq aləmdə mövqeyinin daha da möhkəmlənməsində gənclərin rolu daim yüksək qiymətləndirilir. "Qara qızıl”ın qeyri-neft sektorunun inkişafı üçün aparıcı qüvvə olan insan kapitalına çevrilməsinə istiqamətlənmiş uğurlu gənclər siyasəti nəticəsində Azərbaycan gəncliyi inkişafının mahiyyət və keyfiyyətcə yeni mərhələsinə qədəm qoyub. Bu gün rəqəmsallaşma və yeni nəsil, rəqabətqabiliyyətli gənc kadr potensialının formalaşdırılması Azərbaycan iqtisadiyyatının inkişafı üçün əsas çağırışlardandır. Gənclərin iqtisadi fəallığının artırılması və sahibkarlığın inkişaf etdirilməsinin önəmini qeyd edən İqtisadiyyat naziri bacarıqlı biznesmenlərin və menecerlərin gələcəkdə ölkənin aparıcı qüvvəsinə çevriləcəyini qeyd edib və bunun üçün dövlət dəstək tədbirlərini, həyata keçirilən proqramları diqqətə çatdırıb. Qeyd edilib ki, yeni nəsil idarəçilər üçün həyata keçirilən unikal "Yüksəliş” layihəsi də öz potensialına inanan gənclərə yeni imkanlar açır.
Mikayıl Cabbarov son illər Azərbaycan gənclərinin ictimai fəallığının yüksəldiyini, onların Azərbaycan diasporunun formalaşmasında fəaliyyətində yaxından iştirakını vurğulayaraq, Azərbaycan gənclərinin ölkəmizin iqtisadi qüdrətinin daha da artmasında daim ön sıralarda olacaqlarına əminliyini ifadə edib, gənclərə tövsiyələrini verib.
Sonda İqtisadiyyat naziri gəncləri maraqlandıran sualları cavablandırıb.
