Millət vəkili Qənirə Paşayeva 1 iyun – Uşaqların Beynəlxalq Müdafiəsi Günündə “Dünyanı dəyişən alimlər” kitabını təqdim edəcək və uşaqlar üçün məktəblərə hədiyyə edəcək.
Azərbaycan Xalq Cümhuriyyətinin 95 illik əlamətdar yubileyi, habelə 1 iyun – Uşaqların Beynəlxalq Müdafiəsi Günü münasibəti ilə millət vəkili, dr Qənirə Paşayevanın “Dünyanı dəyişən alimlər” adlanan yeni kitabın təqdimatı keçiriləcək. İyunun 1-də Beynəlxalq Mətbuat Mərkəzində baş tutacaq təqdimatda alimlər, millət vəkilləri, uyğun profilli nazirlik nümayəndələri və KİV-in təmsilçiləri iştirak edəcək. Missiyası, mandatı adından bəlli olan kitab, Azərbaycanda öz formatına, məzmun-mündəricəsinə görə azsaylı nəşrlərdən sayıla bilər. ABAİ İB-nin və “NAR Mobile”nin dəstəyi ilə “Elm və Təhsil” nəşriyyatında nəfis tərtibatla işıq üzü görən “Dünyanı dəyişən alimlər” kitabı, yuxarıda qeyd olunan əlamətdar səbəbələrlə uşaqlara, yeniyetmə və gənclərə, ümumən elmlə, təhsillə maraqlanan bütün Azərbaycan oxucularına bir töhfə olub, respublikanın aparıcı kitabxanalarına, böyük elm-təhsil və mədəniyyət müəssisələrinə, habelə Gənclər Evlərinə, böyük məktəblərin kitabxanalarına Qənirə Paşayeva tərəfindən hədiyyə olunacaq. Millət vəkili Qənirə Paşayeva və onun rəhbərlik etdiyi “Avrasiya Beynəlxalq Araşdırmalar İnstitutu” İctimai Birliyi (ABAİ İB) hesab edir ki, Azərbaycan gəncliyinin kitaba dönüşünə də töhfə sayıla biləcək bu aksiya, yeni nəsillərin elmə, təhsilə motivasiya olunmasında təsirsiz ötüşməyəcək və sözügedən kitab ümumən geniş oxucu kütləsi üçün maraqlı və gərəkli olacaq.
Kitab ümumilli lider Heydər Əliyevin gəncləri elmə səsləyən müraciəti ilə başlayır.
ABAİ İB sədri, millət vəkili dr. Q.Paşayevanın tərtibçi-müəllifi olduğu “Dünyanı dəyişən alimlər"in məsləhətçiləri AMEA-nın müxbir üzvü, millət vəkili Nizami Cəfərov, prof.dr. Hamlet İsaxanlı və prof.dr. Qəzənfər Paşayev, redaktorları Əkbər Qoşalı və Sərvaz Hüseynoğludur.
