Milli Məclisin bu gün keçirilən plenar iclasında Avropa Parlamentin Azərbaycana qarşı qərəzli qətnaməsi pislənib.
AZXEBER.COM trend-ə istinadən xəbər verir ki, deputatlar çıxış edərək Avropa Parlamentinin qətnaməsinin ikili standartların təzahürü, iftira olduğunu diqqətə çatdırıblar.
Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, Avropa Parlamentinin qərəzli qətnaməsi qorxaqlıq, gücsüzlük, islamafob qətnamədir.
O qeyd edib ki, Avropa Parlamentinin Azərbaycanın ərazi bütövlüyünə, suverenliyinə müdaxilə etmək imkanları əlindən alınıb.
"Bu qətnamə həmin qüvvələrin gücsüzlüyünü, qorxalqığını göstərən qətnamədir. Heç bir qətnamə Azərbaycana təsir edə bilməz. Bu qətnamə də əvvəlki qətnamələr kimi tarixin zibilliyinə atılacaq”, - deyə o əlavə edib.
Deputat Aydın Mirzəzadə bildirib ki, bu qətnaməni rədd edirik.
"Bu cür qətnamələr Azərbaycanı haqlı mövqeyindən çəkindirə bilməz. Avropa Parlamenti nə qədər bu cür qətnamələr qəbul etsə də Azərbaycan öz haqlı mövqeyindən əl çəkməyəcək”, - deyə deputat bildirib.
Onun sözlərinə görə, bu qətnamə ölkəmizin ərazi bütövlüyünü şübhə altına alır. "Bu sənəd həm də Avropa Parlamentinin nüfuzuna xələl gətirən qətnamə kimi qiymətləndirilə bilər. Belə başa düşülür ki, Avropa Parlamentində nə kompüter, nə internet, nə də hansısa məlumatı əldə etməyə vasitə var”, - deyə deputat bildirib.
A.Mirzəzadə vurğulayıb ki, Avropa Parlamenti nədənsə Ermənistanın Azərbaycan torpaqlarına olan iddiasına, Xocalı faciəsinə, ərazilərimizin işğalına, bir milyona yaxın vətəndaşlarımızın ata-baba yurdlarından məcburi çıxarılmasına göz yumdu. "Bu gün isə Ermənistanın işğalçılıq siyasətinə müdaxilə etmir. Bu qurum sırf qaragüruhların tribunası kimi görünür. Belə siyasətlə Azərbaycanı müstəqillik yolundan əl çəkdirə bilməz. Onlar qətnamə qəbul etməyə davam etsinlər, biz də ərazilərimizi bərpa etdik”, - deputat əlavə edib.
Digər deputatlar da bildirib ki, Avropa Parlamentinin qəbul etdiyi qərəzli qətnamə antiazərbaycan məqsədi daşıyaraq ədalətə zidd sənəddir. Fransa və Avropa İttifaqı Azərbaycana münasibətdə beynəlxalq hüququn aliliyini pozur. Avropa Parlamentinin qətnamə qəbul etməsindən asılı olmayaraq Azərbaycan güclü dövlətdir və ərazi bütövlüyün tam təmin edib.
