Xəbər verdiyimiz kimi, Azərbaycan Prezidenti İlham Əliyevlə Ermənistanın Baş naziri Nikol Paşinyanın avqustun 8-də ABŞ-nin prezidenti Donald Trampla Vaşinqtonda görüşünün keçirilməsi planlaşdırılır.
Politoloq İlyas Hüseynov planlaşdırılan tarixi görüş ilə bağlı AZXEBER.COM-a açıqlama verib.
Politoloq hesab edir ki, görüşün keçirilməsi sülh prosesində artıq real mərhələ başlayıb və prosesə ciddi hazırlıq gedir:
"Əvvəllər, bu cür görüşlər barədə yayılan məlumatlar cəmiyyətdə təəccüb doğururdu. Lakin zaman keçdikcə artıq aydın oldu ki, görüşə ciddi hazırlıq gedir. Çünki bu tip görüşlər adətən gizli saxlanılır və son anda ictimailəşdirilir. Əbu-Dabidə keçirilən görüşün cəmi bir neçə saat əvvəl razılaşdırılması və Azərbaycanın bunu təsdiqləməsi həmin dialoqun tarixi əhəmiyyətini göstərir. Bu görüşlər Azərbaycan və Ermənistan arasında sülh prosesində siyasi iradə və qətiyyətin nümayişi kimi qiymətləndirilməlidir. ABŞ-nin Azərbaycan və Ermənistanla ayrı-ayrılıqda siyasi gündəliyi var. Bu səbəbdən əvvəl fərdi görüşlərin keçirilməsi daha məqsədəuyğundur. Daha sonra üçtərəfli formatda görüş isə prosesə əlavə simvolik məna qazandıracaq".
Onun sözlərinə görə, ABŞ-nin vasitəçiliyi həm regiondakı maraqlarını ifadə edir, həm də təhlükəsizlik zəmanəti baxımından önəm daşıyır:
"Bu görüş eyni zamanda ABŞ-nin regionda öz maraqlarını qorumaq və təhlükəsizlik zəmanəti vermək niyyətini də ortaya qoyur. Xüsusilə, Zəngəzur dəhlizinə nəzarətin təmin olunması ABŞ-nin prioritetlərindən biridir. ABŞ-nin regionda təhlükəsizlik zəmanəti verməsi Zəngəzur dəhlizinin etibarlı, dayanıqlı və sağlam şəkildə fəaliyyət göstərməsinə gətirib çıxara bilər. ABŞ-nin iştirakı ilə əvvəllər də uğurlu layihələr reallaşıb – Çıraq-Günəşli, Bakı-Tbilisi-Ceyhan və Cənub Qaz Dəhlizi kimi. Bu layihə Azərbaycanın regional əhəmiyyətini və siyasi nüfuzunu artırmaqla yanaşı, sülhün dayanıqlı olmasına da xidmət edəcək. Vaşinqton görüşündən sonra İran və Rusiyanın da bu prosesə daha aktiv müdaxilə etməsi ehtimalı yüksəkdir. Buna görə də ABŞ bu həssas vəziyyətdən istifadə edərək bölgədəki geosiyasi mövqeyini gücləndirmək istəyir."
İlyas Hüseynov Donald Trampın şəxsi istəklərinə də toxunaraq bildirib ki, prezidentin dünyada sülhə nail olmaq və Nobel Sülh Mükafatına layiq görülmək arzusu bu prosesə əlavə təkan verə bilər:
"Donald Trampın şəxsi maraqlarından biri də dünya üzrə konfliktləri həll etmək və Nobel Sülh Mükafatına layiq görülməkdir. Onun daha öncə bir sıra münaqişələrin həllində birbaşa iştirakı olub. Azərbaycan-Ermənistan məsələsində də onun səyləri yüksək qiymətləndirilməlidir. Əsas məqsəd sülhün bərqərar olması, xalqların birgəyaşayışı, rifahı və dövlətlərin tərəqqisidir. Dünya barış içində yaşamalıdır. Bu isə böyük güclərin qətiyyəti və siyasi iradəsi ilə mümkündür."
Oksana Orucova
