Bu gün Müsavat Partiyasının mərkəzi qərargahında Müsavat Partiyasının başqanı İsa Qəmbər, AXCP sədri Əli Kərimli və EL hərəkatının sədri Eldar Namazovun görüşü baş tutub. Görüş zamanı müzakirə olunacaq məsələlər barədə detallı məlumat hələ də mətbuata verilməyib.

Ekspertlərin fikrincə görüşdə müzakirə olunan ən əsas məsələ sabah elan ediləcək “Milli Şura” ətrafındakı söz-söhbətlərdir.

Məsələylə bağlı AZXEBER.COM-a danışan Vətəndaş və İnkişaf Partiyasının (VİP)sədri Əli Əliyev “Milli Şura”nın Rusiyanın Azərbaycana təzyiq etməsi üçün həyata keçirtdiyi yeni layihə olduğunu söyləyib:

“Mən “Milli Şuranı” Moskvanın layihəsi hesab edirəm. Bir sıra partiyalar çarəsizlikdən bu layihəyə baş qoşublar. Bir qisim insanlar isə məhz Moskvanın Azərbaycanda siyasi aləti olmaq istəyini ortaya qoyub”.

Partiya sədri “Milli Şuranı” Azərbaycanın suverenliyinə qarşı təhdid olduğunu söyləyib:

“Bu Azərbaycanın Avrasiya İttifaqına sürüklənməsi, Azərbaycanda seçki ilində güzəştlərin qoparılması, Azərbaycanın qərar vermək səlahiyyətlərini əlindən alınması üçün həyata keçirilən layihədir. O görüşdə kimin iştirak etməsindən asılı olmayaraq biz mövqeyimizi 2 ay bundan öncə bəyan etmişik və öz mövqeyimizin üzərində də qalırıq. Biz bu layihəni Moskvanın layihəsi elan etmişik və bunu Azərbaycanın suverenliyinə təhdid, təhlükə kimi görürük. Milli Şura fəaliyyətə başladığı zamandan o bizim siyasi problemimizə çevriləcək”.

Qeyd edək ki, bundan öncə Müsavat başqanı İsveç və Türkiyədə səfərdə olub, Eldar Namazov isə Rusiya paytaxtında Rüstəm İbrahimbəyovla ciddi müzakirələr apararaq vətənə dönüb.

Görüşün bu səfərlərdən dərhal sonraya təsadüf etməsi də diqqət çəkir.

Fatimə