“İllərdir İsgəndər Həmidovlarla, Əli Kərimlilərlə mitinqlərdə böyük vədlər vermək heç nəyi həll etmir”.
Bu sözləri AZXEBER.COM-a açıqlamasında millət vəkili, prezidentliyə namizəd Zahid Oruc söyləyib. Onun sözlərinə görə, Milli Şuranın 22 sentyabr tarixində keçirilən razılaşdırılmış mitinqində iştirak edən insanların azlığı sözügedən qruma olan inamsızlığın göstəricisidir:
“Milli Şuranın dünən baş tutan mitinqi bir daha əhalinin bu mitinqə olan marağını göstərdi. Hamı da gördü ki, orada nə qədər adam var idi. Əsas odur ki, dünən dönər satan da, evinə gedən də öz işində idi. Bu bir daha onu deməyə əsas verir ki, illərdir İsgəndər Həmidovlarla, Əli Kərimlilərlə mitinqlərdə böyük vədlər vermək heç nəyi həll etmir. Mitinqin şəhərin mərkəzi yerlərindən birində keçirilməsi, metroya yaxın olmasına baxmayaraq, mitinqdə iştirak edənlərin azlığı bir daha insanların Milli Şuraya olan inamının göstəricisidir. Bu mənada bu mitinqləri izləyənlər bizim qiymətimizi daha yaxşı başa düşəcəkdir.
Eyni zamanda Milli Şuranın vahid namizədi Cəmil Həsənli özü də yaxşı düşünməlidir ki, onun vahid namizəd kimi irəli sürülməsi heç də onun siyasi peşəkarlığından irəli gəlmir. Həmin düşərgədə olan çəkişmələr, intriqalar, bir-birinə güzəştə getməmələri Cəmil Həsənlinin vahid namizəd olmasına səbəb oldu”.
Əfsələddin Ağalarov
