Pərviz Cəbrayılın “Yad dildə” romanının MKM-in 1-ci yerinə layiq görülməsi ədəbi dairələrdə birmənalı qarşılanmayıb. Hətta MKM-in münsiflər heyətinin bir neçə üzvü buna etiraz əlaməti olaraq istefa veriblər.
Qalmaqalla bağlı müzakirələr davam edərkən məlum olub ki, Milli Kitab Mükafatının münsiflər heyətinə daxil olan daha bir yazıçı müsabiqənin ilk onliğuna düşən əsərlərlə tanış olmayıbmış.
Bunu Milli Kitab Mükafatının təsisçisi Nigar Köçərli “Azadlıq” radiosundakı çıxışı zamanı etiraf edib. O, deyib ki, münsiflər heyətinin üzvü Vaqif Səmədoğlu da müsabiqəyə təqdim olunan əsərləri oxumayıbmış. Belə məlum olur ki, V.Səmədoğlu səhhətindəki problemlər səbəbindən mükafat uğrunda mübarizə aparan yazarların əsərlərini oxuya bilməyəcəyini bildiribmiş. Bu isə o deməkdir ki, V.Səmədoğlunun adı münsiflər heyətində göstərilsə də, o, faktiki istefa veribmiş.
Xatırladaq ki, “525-ci qəzet”in baş redaktoru Rəşad Məcid və Yazıçılar Birliyinin katibi Çingiz Abdullayev “Yad dildə” romanına 1-yerin verilməsinə etiraz əlaməti olaraq münsif üzvlüyünündən getdiklərini bəyan ediblər.
Daha öncə isə BDU-nun professoru, parlamentin İnsan hüquqları komitəsinin sədri Rəbiyyət Aslanova da işlərinin çoxluğu səbəbindən MKM-in Münsiflər Heyətindən istefa vermişdi.
/// modern.az
