İspaniya La Liqasının 30-cu turu çərçivəsində keçirilmiş "Real" - "Sportinq" matçı gözlənilməz nəticə ilə yekunlaşıb. Doğma meydandakı matça bir çox itki ilə çıxan Madrid klubu rəqibinə boyun əyib.
Matçın ikinci hissəsində fərqlənən qonaqlar daha sonra qapısının toxunulmazlığını qoruya biliblər və Madriddən qələbə ilə ayrılıblar. Bu məğlubiyyət Joze Mourinyo üçün daha ağır olub. Jozenin "Porto" ilə 2002-ci ildə başlayan seriyası "Sportinq"lə oyunda başa çatdı. Göstərilən ildə "Beira-Mar"a doğma divarlar arasında məğlub olan Mourinyonun seriyası bu matçdan sonra başladı.
Düz 9 ildir ki, işlədiyi komandaların (Porto, Çelsi, İnter və Real) ev oyunlarında məğlub olmayan Joze dünən "Sportinq"ə uduzaraq rekordunu əldən verib. Dünənki matç doğma divarlar arasında 150 oyunluq məğlubiyyətsizlik seriyası əldə etmiş Jozenin inanılmaz rekordunun bitməsi ilə yanaşı, digər bir amillə də yadda qalan olub. Belə ki, bu mövsüm "Santyaqo Bernabeu"da keçirilmiş ilk 14 oyunun hamısında qələbə qazanmış "Real" mövsüm ərzində azarkeşləri qarşısında ilk dəfə məğlubiyyətlə üzləşib.
/// premyerliqa.az
