“Səfərdə oynamağımıza baxmayaraq, Şimali İrlandiya ilə görüşdə ən azı bir xala ümid etmək olar. Düzdü, millimizin heyətində itkilər var. Təcrübəli futbolçuların çıxış etməməsi müdafiəmizdə problemlər yarada bilər. Lakin mətbuatdan oxudum ki, rəqibin də iki əsas futbolçusu bu görüşdə iştirak etməyəcək. Lakin istənilən halda üstünlük meydan sahiblərindədir”.
Bu sözləri Azərbaycan millisinin sabiq futbolçusu Emin İmaməliyev sabah Şimali İrlandiyaya qarşı keçiriləcək DÇ-2014-ün oyunu haqda danışarkən deyib.E.İmaməliyevin fikrincə, millimiz müdafiə futbolu oynasa, bu, onun ziyanına işləyəcək: “Komandamız daha çox topla oynamağa üstünlük verməlidir. Müdafiədə oturmaqla uğur əldə etmək nadir hallarda olur. Yığmamızın əksər oyunları göstərdi ki, müdafiə futbolu bizdə alınmır. Sırf hücum futbolu da oynamaq olmaz. Sadəcə, bacardığımız qədər hücum etmək lazımdır”.
Emin İmaməliyev millinin heyəti barədə də fikir yürüdüb: “Yaxşı olardı ki, legionerlərin yerinə gənc yerli futbolçuları komandaya çağıraydı. Mən milliyə layiq olan, lakin qıraqda qalan bir neçə futbolçunun adını çəkə bilərəm. Son zamanlar “Qarabağ”ın heyətində çempionatın ən yaxşı müdafiəçilərindən olan Qara Qarayevin millidən kənarda qalmasını anlamıram. “Bakı”nın heyətində Rəhman Hacıyev çox cəld və sürətli futbolçudur. “Neftçi”də Cavid İmamverdiyev və Mirhüseyin Seyidov əla təsir bağışlayır. Bu futbolçular da xeyli Avropa təcrübəsi qazanıblar və millidə oynaya bilərlər”.
//Qol.az
